Според портпаролката на Стејт департментот Тами Брус, Рубио изјавил дека американскиот претседател Доналд Трамп не сака да го задржи статус квото во врска со Панамскиот канал со оглед на зголеменото влијание на Кина во регионот.
Според неа, Рубио го информирал Мулино дека Трамп донел прелиминарен заклучок дека моменталната состојба на влијанието и контролата на кинеската Комунистичка партија врз зоната на Панамскиот канал претставува закана за каналот и претставува кршење на Договорот за постојана неутралност и функционирање на Панамскиот канал. Брус нагласи дека „ова статус кво е неприфатливо“ и дека „во отсуство на итни промени, САД ќе мора да преземат неопходни мерки за заштита на своите права според договорот“.
По средбата, Мулино рече дека Панама нема да го обнови меморандумот за разбирање со Кина за приклучување кон иницијативата „Појас и пат“ и посочи дека договорот може да заврши предвреме.
Тој рече дека Панама ќе се обиде да соработува со САД кога станува збор за нови инвестиции, вклучително и инфраструктурни проекти.
Мулино истакна дека за суверенитетот над Панамскиот канал не може да се преговара. Претседателот на Панама понуди да помогне во враќањето на некои мигранти доколку САД платат за тоа.
„Кина управува со Панамскиот канал. Не ѝ беше даден на Кина, ѝ беше даден на Панама – глупаво – но тие го прекршија договорот, а ние ќе го вратиме назад, или ќе се случи нешто многу моќно“, изјави Трамп за новинарите во неделата.
„Мислам дека нема да бидат потребни војници во Панама“, додаде тој.
Иако самиот канал е управуван од Панама, две од пристаништата се управувани од јавната компанија ЦК Хачинсон од Хонг Конг, додека со другите пристаништа во близина управуваат приватни компании од Соединетите Американски Држави, Сингапур и Тајван.
Соединетите Држави го изградија Панамскиот Канал во раните 1900-ти, историски подвиг во тоа време што ја отвори рутата за воени и трговски бродови, и се откажа од контролата над тој воден пат во 1999 година во согласност со договорот што го потпишаа претседателот Џими Картер – договор што Трамп го омаловажи, наведувајќи во претходна изјава дека „давањето на Панамскиот канал на Панама беше голема грешка“.
