Како што се наведува, научниците вршеле тестирање во Мохе, во провинцијата Хајлунаџанг на североистокот на Кина. Тестирањето го спровел тим предводен од академикот Чен Џонгвеј од Институтот за хемиска физика во Далијан при Кинеската академија на науките.
Технологијата за батерии за екстремно ниска температура, развиена од тимот преку систем за управување со енергија со вештачка интелигенција (ВИ), реши клучен проблем во индустријата, а тоа е ненадејниот пад на активноста, значително намалениот домет, па дури и целосното откажување на конвенционалните литиумски батерии на ниски температури.
Се наведува дека во екстремно ладна средина од минус 34 степени Целзиусови, литиумската батерија, без надворешни мерки за изолација за одржување на топлината, задржала повеќе од 85 проценти од својот ефективен капацитет откако стоела повеќе од 8 часа. Потоа батеријата успешно напојувала дрон од индустриски квалитет за да извршува долги летови и симулации на повеќе мисии.
Еден од истражувачите, Џанг Менг, посочи дека се очекува ова достигнување да го реши проблемот со батериите што се „чувствителни на замрзнување“ во екстремно студени региони, обезбедувајќи сигурна енергија за операции како што се спречување шумски пожари, инспекција на далноводи и комуникација во итни случаи на големи надморски височини и во студени услови во Кина, но и ширум светот.
