Заменувањето на само еден час гледање телевизија со други активности, како што се вежбање, рекреација, пешачење или спиење, може да го намали ризикот од развој на тешка депресија. Ако замените половина час гледање телевизија со вежбање, го намалувате ризикот од депресија за 18 проценти. Кај постарите возрасни лица, оваа едноставна промена го намалува ризикот за речиси 30 проценти.
Слично намалување на ризикот од депресија е забележано кога еден час гледање телевизија е заменет со сон. Резултатите од истражувањето беа објавени во стручното списание „Европска психијатрија“.
„Овие резултати ја поддржуваат промоцијата на различни физички активности кај оваа возрасна група. Намалување на времето поминато пред телевизор може да биде особено ефикасна стратегија за јавно здравје за возрасните на средна и постара возраст. Иако не се пронајдени значајни ефекти кај младите возрасни, поттикнувањето на активен животен стил останува важно, бидејќи раната физичка активност го предвидува идното однесување“, наведоа авторите.
Експертите со години предупредуваат дека седечкиот начин на живот може да го зголеми ризикот од низа сериозни здравствени проблеми, вклучувајќи дебелина, дијабетес тип 2, рак, па дури и прерана смрт.
Тимот од Универзитетот во Гронинген вели дека не станува збор само за времето поминато во мирување. Ментално пасивните активности, како што е гледањето телевизија, можат да го зголемат ризикот од депресија поради нарушување во регулацијата на допамин, зголемена консумација на нездрава храна и социјална изолација.
Неодамнешна студија покажа дека секој дополнителен час гледање телевизија е поврзан со пет проценти зголемен ризик од депресија.
„Затоа, насочување на вниманието на гледање телевизија, наместо на вкупното време поминато во седење, може да понуди поспецифична и поефикасна основа за интервенции“, заклучи тимот.
