Москва верува дека „идејата“ за прекин на огнот е „правилна“, им рече Путин на новинарите за време на заедничката прес-конференција со белорускиот претседател Александар Лукашенко денеска во Москва. „Ние апсолутно ја поддржуваме“, додаде тој.
„Ја поддржуваме идејата за решавање на конфликтот преку мирни средства“, рече рускиот претседател.
Сè уште треба да се разговара и да се решат одредени прашања пред да се постигне примирје, изјави Путин, додавајќи дека Москва особено треба да разговара за нив со САД. За дијалогот може да биде потребен и личен разговор со американскиот претседател Доналд Трамп, рече рускиот лидер.
Путин рече дека нив ги загружуваат системите за „контрола и верификација“ за следење на режимот на прекин на огнот, како и потенцијалните обиди на Киев да ја искористи паузата во борбите за повторно да ги вооружи и зајакне своите трупи на фронтот.
„Дали ќе се искористат 30-те дена за продолжување на присилната мобилизација во Украина, за снабдување со оружје и за обука на новоформираните единици?“, изјави претседателот. „Дали ќе има какви било гаранции дека ништо од тоа нема да се случи?“
Ситуацијата во регионот Курск, на руската граница, исто така може да биде главна спорна точка, според рускиот претседател. Путин праша дали прекинот на огнот ќе значи дека Русија ќе мора да им дозволи на сите украински војници што ја нападнаа областа во август 2024 година да ја напуштат.
„Дали треба да ги пуштиме да излезат откако извршија многубројни злосторства над цивилите? Или Киев ќе им нареди да го положат оружјето?“, праша тој.
