Како што информира Центарот за управување со кризи (ЦУК), вчера попладне имало координирана спасувачка акција на институциите и службите од Системот за управување со кризи и локално население за спасување и извлекување повреден планинар на непристапен терен.
Преку бројот за итни случаи 112 во ЦУК вчера, во 14:12 часот, била добиена пријава за повреден планинар со скршеници на ногата, од локација над село Лавчани, поточно на местото Два Камења во Општина Кичево, по што почнала координирата акција.
Лицето се наоѓало на непристапен терен. Поради непристапноста на теренот и неможноста за пристап за моторно возило, повреденото лице било преземено и пренесено од локалното население со коњ до селото Лавчани, каде итната медицинска помош и ПС Кичево го преземале повреденото лице и потоа го пренеле до Специјализираната болница за ортопедија и трауматологија „Св.Еразмо“ во Охрид.
