„Хуманитарната ситуација во Либан достигна ниво посериозно отколку во војната во 2006 година“, објави во неделата ОЦХА, канцеларијата за итна помош на ОН.
„Ситуацијата повторно ескалира во последниве денови, израелската војска издаде наредба за евакуација на жителите на Баалбек и Набатиех непосредно пред воздушните напади на тие локации“, се додава.
Канцеларијата соопшти дека хуманитарната ситуација „е влошена со уништувањето на критичната инфраструктура, вклучително и здравствената заштита, при што многу болници се преполни и итно повикуваат на дарување крв за да се одговори на критичниот прилив на жртви“.
Сегашната војна меѓу Израел и Хезболах започна на 8 октомври минатата година со ракетни напади на либанската шиитска милиција во знак на поддршка на исламистичкото движење Хамас во Појасот Газа, кое ја започна војната во Газа еден ден претходно со својот терористички напад врз Израел.
Оттогаш во Либан се убиени речиси 3.000 луѓе, а според официјалните податоци 13.300 се ранети. Министерството за здравство во своите списоци не ги издвојува цивилите од членовите на Хезболах.
Меѓу загинатите има околу 180 малолетници и 600 жени. ОЦХА во својот последен извештај истакна дека повеќе од 11.000 бремени жени биле погодени од војната, вклучително и 1.300 кои морале да родат во здравствен систем на работ на колапс.
Хуманитарниот координатор за Либан, Имран Риза, ги осуди нападите врз цивилите и инфраструктурата.
Тој повика на „итен прекин на непријателствата за да се заштити ранливото население“.
