Социјалистичката партија (ПС), која пред две години освои апсолутно мнозинство со 41,4 отсто од гласовите, сега е на второто место со 28,66 отсто од гласовите, или 77 пратенички места. Бројот на претставниците на екстремната десница Чега е зголемен за четири пати и ќе има најмалку 48 места во парламентот. По конечното пребројување на гласовите од странство ќе бидат доделени четири пратенички места.
Овој резултат не му дозволува на победникот да формира апсолутно мнозинство од најмалку 116 претставници, дури ни во коалиција со малата либерална партија што е на четврто место со 5 отсто од гласовите, односно осум пратенички места.
Монтенегро сепак прогласи победа на парламентарните избори, велејќи дека сака да владее со „релативно мнозинство“ во парламентот, повторувајќи го своето одбивање да ја води земјата со поддршка на екстремната десница. „АД победи на изборите“, им рече Монтенегро на приврзаниците собрани во понеделникот рано наутро, додавајќи дека е клучно партиите во новиот парламент да се однесуваат одговорно и „да ја почитуваат волјата на португалскиот народ“.
Главниот ривал на Монтенегро, Педро Нуно Сантос, го призна поразот откако неговата Социјалистичка партија (ПС), која е на власт од 2015 година, заврши на второто место со многу мала разлика. Тој ја отфрли можноста за поддршка на програмата на АД, која вклучува даночни намалувања.
Претседателот Марселу Ребелу де Соуза допрва треба официјално да го покани лидерот на АД да формира влада, што Монтенегро и го очекува. Монтенегро изрази надеж дека ПС и Чега „нема да создадат негативен сојуз за да ја спречат владата што ја сакаат Португалците“.
ПС заостануваше зад АД во повеќето анкети откако социјалистичкиот премиер Антонио Коста поднесе оставка во ноември поради истрага за корупција. Сантос рече дека неговата партија сега ќе биде на чело на опозицијата, која не смее да ѝ биде препуштена на Чега.
Екстремно десничарската партија водеше кампања со ветување дека ќе се бори против корупцијата и изразувајќи непријателство кон она што го гледа како „прекумерна“ имиграција. Лидерот на Чега, Андре Вентура, им рече на новинарите дека изборите во неделата „јасно покажуваат дека Португалците сакаат влада на АД и Чега“. Тој веќе кажа дека Монтенегро ќе биде одговорен за политичката нестабилност доколку одбие да преговара.
