Санторини доживува сеизмичка активност од минатиот месец, а Сеизмолошката лабораторија на Универзитетот во Атина забележа повеќе од 12.800 земјотреси. Некои жители патролираат во опасните области за да ги спречат туристите да се искачуваат на карпи и да фотографираат.
Поради зачестеноста и јачината на земјотресите, во многу делови на Санторини имало одрони, а експертите не ја исклучуваат можноста за уште посилен земјотрес. Иако сеизмолозите оптимистично најавија дека интензитетот на земјотресите ќе почне да се намалува, сега се загрижени дека ситуацијата се влошува.
Вонредната состојба во Санторини ќе остане на сила најрано до 3 март, јавува Би-би-си.
На земјотресот во неделата му претходеа три помали земјотреси со јачина поголема од 4,0 степени, додека три земјотреси вчераутро беа исто така посилни од 4,0 степени. Проверките покажаа дека нема оштетувања на згради на Санторини и Аморгос.
Нема пријавени повредени од земјотресите, кои од 26 јануари ги имаше илјадници, но повеќе од 11.000 луѓе ги напуштија островите. Училиштата на Санторини, Аморгос и на неколку други острови денеска ќе останат затворени.
Тим од Специјалната единица за одговор при катастрофи тргна од Патра за Аморгос со специјално возило за спасување во случај на земјотрес, а се очекува технички тимови да ја прегледаат електричната мрежа на островот.
Костас Папазахос, професор по сеизмологија на Универзитетот Аристотел во Солун, за грчката телевизија ЕРТ изјави дека властите мора да очекуваат ситуацијата да трае до поголемиот дел од февруари. „Да се надеваме дека полека ќе се движиме кон постепена деескалација“, рече тој.
„Мораме да бидеме трпеливи и да видиме. Да се надеваме дека за неколку недели феноменот ќе почне да слабее“. Тој додаде дека не е целосно исклучена можноста за поголем земјотрес.
Во меѓувреме, крузерот „Викинг стар“ со 893 патници и 470 членови на екипажот вчераутро се закотви на пристаништето Соуда на Крит. Тој требаше да биде првиот крузер во сезоната на Санторини, но ја смени маршрутата за да избегне гужви на жичарницата за време на сеизмичка активност, јавува Би-би-си.
Најсилниот земјотрес регистриран за време на оваа сеизмичка активност беше со јачина од 5,2 степени во четвртокот. Земјотресите со јачина од 6 и повеќе се сметаат за сериозни. Грција е една од сеизмички најактивните земји во Европа, но научниците се збунети од сегашните „кластери“ земјотреси кои не се поврзани со поголем земјотрес.
Санторини се наоѓа на таканаречениот хеленски вулкански лак, синџир од острови формирани од вулкански ерупции, но последната голема ерупција се случи во 1950-тите. Грчките власти изјавија дека неодамнешните земјотреси се поврзани со движењето на тектонските плочи, а не со вулканската активност.
Научниците не можат точно да предвидат време, големина или локација на земјотрес. Од 26 јануари до 8 февруари 2025 година, Сеизмолошката лабораторија на Универзитетот во Атина регистрирала повеќе од 12.800 земјотреси во зоната Санторини-Аморгос, заклучува Би-би-си.
