Од јануари на небото со голо око може да се видат Венера, Марс, Јупитер и Сатурн, а со помош на телескоп Уран и Нептун, кои од Земјата изгледаат како да се наредени во линија.
В петок Меркур ќе им се придружи на овие небесни тела.
Од денеска до петок, повеќето планети ќе бидат видливи со голо око веднаш по зајдисонцето.
Меркур, Венера, Јупитер и Марс ќе бидат видливи со голо око, Сатурн ќе биде потешко забележлив бидејќи ќе биде ниско на хоризонтот, додека Уран и Нептун може да се видат само со телескоп, пишува Саенс алерт.
Планетарното порамнување ќе биде видливо речиси низ целиот светот вечерта на 28 февруари. Сепак, локациите како Мексико и Њујорк ќе имаат најдобра видливост на 25 февруари, додека Мумбаи, Пекинг и Сиднеј ќе имаат најдобар поглед на 3 март, според Стар вок.
Не е невообичаено неколку планети да се наоѓаат на иста страна од Сонцето во исто време, но поретко е повеќето или дури и сите планети вака да се порамнат.
Секој број на планети од три до осум претставува порамнување, а составувањето пет или шест планети е познат како големо порамнување.
Порамнувањата на пет планети се значително почести од порамнувањата на шест, а големите порамнувања со седум планети се најретки.
Порамнување од четири или пет планети, кои се видливи со голо око, се случува на неколку години, а кон крајот на август пред изгрејсонце одеднаш ќе бидат видливи четири планети.
