Форбс пишува дека Џеј Пи Морган во новата белешка до клиентите истакнува дека пазарната вредност на Тесла паднала за 127 милијарди долари за само еден ден оваа недела, додека политичкиот ангажман на Маск станува сè поконтроверзен.
„Тешко ни е да се сетиме на нешто слично во историјата на автомобилската индустрија, каде што некој бренд изгубил толку многу вредност за толку кратко време“, пишуваат аналитичарите на Џеј Пи Морган.
Предводен од автомобилскиот аналитичар Рајан Бринкман, извештајот на банката ја намали прогнозата за испорака на возила на Тесла за првиот квартал од 444.000 на 355.000, што е пад од 20%. Ова ги одразува стотиците милијарди долари што Тесла ги загуби во последните месеци.
Главната причина за овој пад, според Џеј Пи Морган, е „акутното“ влијание на политичките активности на Маск додека тој презема „сè поделена улога во владата“ – што е финансиски еуфемизам за оценката дека Маск ја уништува Тесла со својот политички ангажман.
„Работата на Маск во ДОГЕ предизвика контроверзии во земјата“, напиша Бринкман, пренесува Бизнис инсајдер, додавајќи дека „иако има еднаков број на оние од десницата кои се задоволни како и оние од левицата кои се незадоволни, влијанието врз продажбата на Тесла сепак е негативно“.
Бринкман, исто така, истакна дека Тесла е „изложена на најголем ризик“ поради „променливата регулаторна клима“ во администрацијата на Доналд Трамп, што е иронично ако се земе предвид дека Трамп, и покрај својот непријателски став кон електричните возила кога ги нарече „демократско лудило“ и „нова зелена измама“ за време на кампањата, оваа недела изјави дека ќе купи нов Тесла за поддршка на Маск.
Во Европа ситуацијата е уште полоша, пишува Џеј Пи Морган. Блиските односи на Маск со Владимир Путин, дистанцирањето од Украина, анти-НАТО ставовите и поддршката за „екстремно десничарските политички партии“ – сето тоа, според Бринкман, сериозно му наштетува на угледот на Тесла. Како резултат на тоа, регистрациите на нови возила на Тесла во Европа во јануари паднаа за 50% во споредба со истиот период во 2024 година.
Аналитичарите истакнаа дека јапонските и корејските автомобилски компании доживеале сличен пад поради дипломатските спорови со Кина, но ситуацијата на Тесла е уште полоша бидејќи таа е глобална компанија која „не е врзана за некоја конкретна земја или регион“.
Извештајот доаѓа откако Морган Стенли сугерираше дека акциите на Тесла сè уште вредат да се купат и може да скокнат до 90%, што укажува на несигурност и поделеност меѓу финансиските институции во проценката на иднината на Тесла.
Од друга страна, не е чудно што Џеј Пи Морган зазема песимистички став кон Тесла, имајќи предвид дека банката до неодамна водеше правна битка со компанијата на Маск за продадените акции пред десет години.
