„Да тоа е капитален проект. Треба да е комплетен, а второ треба да се потрошени оние 10 милиони евра кои што веќе се дадени за реализација на еден таков капитален проект како што е Булеварот Хасан Приштина кој што не само што не е почнат две години, туку ниту фенинг не е потрошен“, рече тој.
„Ако некој нема капацитет да реализира капитални инвестиции, како што е тој булевар, иако до мене стигаат многу информации дека се тргува со тие средства кои ги има Градот Скопје на својата сметка, па се бараат градежни фирми кои тоа ќе го изведуваат и итн., тогаш има институции кои со тоа се занимаваат. Факт е дека тој проект не е почнат со реализација и сега кога ќе видите дека некои 10 милиони евра му стојат 2 години на сметка, а не инвестирал ништо, тогаш логично е да поставите прашање зошто и тие 10 милиони евра не си ги вратиме назад во буџетот и да ги искористиме за нешто што е потребно за граѓаните во некои општини кои се поподготвени“, дециден е Мицкоски.
За односите со Бугарија, Мицкоски изјави дека сè поголем е бројот на дипломати во Европа и во светот кои гледаат со симпатија на нашите аргументи, на нашата позиција и на можното решение што ние го предлагаме. Настапуваме со факти и ги браниме интересите. Прашањето е каква волја има, да најдеме решение или не. Зошто да не го почитуваме Договорот за добрососедство? Не протоколот, не предлогот, туку Договорот. Во Договорот со Бугарија не стои дека треба да има уставни измени. Епа, тогаш, ајде да го почитуваме, ние тоа бараме, да го почитуваме Договорот, Договор е или не? Ајде да го почитуваме“, рече вечерва премиерот Христијан Мицкоски.
Зборувајќи за деблокирањето на евроинтеграцискиот процес, Мицкоски, уште еднаш потенцира дека е оптимист. Сите аргументи, според него, се на наша страна. Истакна и дека е многу важна пораката што се испраќа од официјална Софија.
„Мултилатерален или билатерален е проблемот? Која е пораката? Слушаме збунувачки тонови и изјави од Софија. Се надевам дека откако ќе се консолидира општеството по изборите, ќе имаме појасна слика и дека ќе добиваме конечни пораки. Ние велиме, тогаш кога бугарскиот парламент ќе го ратификува пристапниот договор на државава во ЕУ, тогаш уставните измени да важат. Ајде уште едно ремек-дело да направиме“, истакна Мицкоски, алудирајќи на Преспанскиот договор кој дипломатите во минатото, како што нагласи, го претставувале како ремек-дело. Тој уште еднаш кажа дека додека ја предводи Владата, националните интереси ќе бидат одбранети.
„Голем дел од европските и светските дипломати со симпатија гледаат на нашите аргументи и позиции поврзани со евентуално можно решение кое го предлагаме и за кое зборуваме изминатиов период. Конечно на нас како држава се гледа како на партнер, а не како на нешто за поткусурување. Мислам дека ги вративме кредибилитетот и достоинството на меѓународната сцена. Можеби е потешко како помала држава да ги браните националните интереси, но сè додека јас ја предводам Владата, националните интереси ќе се бранат и ќе се одбранат“, подвлече премиерот.
Мицкоски порача дека времето ќе покаже дали бил оправдан оптимист.
„Очекувам темава во периодот што следи да има завршница за да го одблокираме процесот и да почнеме да преговараме“, нагласи Мицкоски.
