„Понатамошните иследувања во однос на невролошки снимања на централниот нервен систем и другите системи се во тек. Сѐ уште е рано да прогнозираме за последиците. По нашите проценки мислам дека е оштетен доста мозокот, по тие манифестации, но сѐ уште е рано да процениме колку и до кој степен“, изјави денеска Мемеди.
Новороденчето, според него, било примено со тешка асфекција, со многу ниски оценки на раѓање, без срцева акција и без дишење. Било анимирано во кумановската болница и на Детската клиника пристигнало во тешка, критична општа состојба, поставено на респираторна машина.
Министерот за здравство Арбен Таравари соопшти дека се потребни осум дена за комплетирање на целата документација од стручниот наод која треба да утврди дали имало пропусти при породувањето со 31-годишната родилка во кумановската болница.
Иако најави дека извештајот може да се очекува денеска, на денешната прес-конференција на која имаше отчет за работата од првите 100 дена на Владата, Таравари кажа дека тоа ќе биде најдоцна до вторник или среда идната недела.
Одговарајќи на новинарски прашања, тој посочи дека протоколите по кои се работи во болниците за гинекологија се обновени, но и оти во изработка се нови за постапување со пациентите, како за работата на гинекологија, така и за сите болници.
„Осум дена се потребни за комплетирање на целата документација за да кажеме дефинитивно дека имало или немало лекарска грешка. Протоколите се абдејтирани, а во моментот подготвуваме и нови за сите, не само за Гинекологија, кои ќе бидат објавени до почетокот на ноември или во текот на ноември“, рече Таравари.
Во Кумановската општа болница на 1 октомври Државниот санитарен и здравствен инспекторат изврши вонреден инспекциски надзор за случајот со починатата родилка. Надзорот покажал дека родилката при породување била во добра здравствена состојба и редовно се прегледувала кај матичниот гинеколог.
