Електронските пораки дојдоа веднаш откако милијардерот Илон Маск, кој е и шеф на Одделот за владина ефикасност (ДОГЕ) на администрацијата на Трамп, објави на социјалната мрежа Икс дека ако не одговорат на барањето ќе се смета за оставка.
„Во согласност со инструкциите на претседателот Доналд Трамп, сите вработени во федералната влада наскоро ќе добијат електронска пошта во која ќе се бара да објаснат што направиле минатата недела. Доколку не се одговори на пораката ќе се смета за оставка“, напиша Маск на социјалната мрежа Икс.
Consistent with President @realDonaldTrump’s instructions, all federal employees will shortly receive an email requesting to understand what they got done last week.
Failure to respond will be taken as a resignation.
— Elon Musk (@elonmusk) February 22, 2025
Објавата на Маск дојде само неколку часа откако Трамп на својата социјална мрежа Трут соушл рече дека ДОГЕ треба да стане поагресивен во напорите да ја намали и преобликува федерална работна сила од 2,3 милиони, според Ројтерс.
Почнувајќи од саботата вечер, електронски пораки беа испратени до вработените низ федералните агенции, вклучително и Комисијата за хартии од вредност, Националната администрација за океани и атмосфера, Центрите за контрола и превенција на болести и други со наслов „Што работеше минатата недела?“.
Во пораката, видена од Ројтерс, од вработените се бара да одговорат во пет точки со кои се сумира „што сте постигнале на работа минатата недела“.
Нејасно е каква правна основа има Маск да ги отпушти федералните работници доколку тие не одговорат на неговото барање и што би се случило со вработените кои не можат да ја опишат доверливата работа.
Некои вработени во федералното правосудство добија е-пошта од ОПМ во саботата, иако судскиот систем не е дел од извршната власт, велат познавачите на ова прашање.
Брзиот и контроверзен процес на администрацијата на Трамп за намалување на владините трошоци со намалување на федералната работна сила, предводена од Маск и неговите млади соработници за намалување на трошоците во ДОГЕ, доведе до случајни отпуштања што резултираа со бројни грешки и принуди неколку агенции брзо повторно да вработуваат витални вработени, како што се оние кои работат на нуклеарна безбедност, одбрана и производство на електрична енергија.
