Државниот комунален инспекторат, Државниот инспекторат за животна средина, Државниот санитарен и здравствен инспекторат и Институтот за јавно здравје, во координација со Министерството за внатрешни работи, веднаш треба да отпочнат со вонреден инспекциски надзор на територијата на Град Скопје. Целта е утврдување на состојбата со комуналниот и друг вид отпад и преземање соодветни мерки и активности.
Воедно, МВР, заедно со надлежните институции и Град Скопје – Сектор инспекторат, е задолжено да го испита работењето на ЈП Комунална хигиена и на градоначалникот на Град Скопје во врска со несобирањето на отпадот, што претставува потенцијална опасност по здравјето на граѓаните, велат од Владата.
Истовремено, Основното јавно обвинителство Скопје веќе постапува и презема дејствија за обезбедување докази за евентуално кривично дело. Јавниот обвинител издал наредби до МВР и до други надлежни органи за итно постапување и проверки во однос на работењето на ЈП Комунална хигиена. До комуналните инспекциски служби се доставени барања за спроведување на вонреден надзор и констатирање на моменталната состојба.
Од Владата нагласуваат дека состојбата е сериозна и, иако надлежноста е на Град Скопје, поради континуираното непостапување, институциите се повикуваат веднаш да ги спроведат донесените заклучоци.
Како што претходно објавивме во „Комунална хигиена“ велат дека се е ок со ѓубрето и директорот си е на работа и дека ако има проблем со некоја улица, да пратиме мејл и ќе се собере ѓубрето.
