Според последните информации на Институтот за јавно здравје во Куманово регистрирани се 30-тина случаи на лица од грип и заболувања слични на грип. Според податоците од Ургентниот центар, бројот на прегледи за време на дежурствата во последните денови е значително намален.
„Изминатиот месец имавме и до 150 прегледи за време на дежурствата, додека сега таа бројка е намалена на околу 50. Во моментот се забележува намалување на бројот на заболени, а и симптомите се со поблаг интензитет“, изјави д-р Дарко Каранфиловски од Ургентниот центар при Општата болница Куманово.
Според него, иако сè уште има пациенти со грип, најчесто станува збор за полесни симптоми како болки во грлото, покачена температура и малаксаност. Сепак, регистрирани се и потешки случаи кај кои инфекцијата преминува во сериозни респираторни компликации.
„Кај поголемиот дел од пациентите симптомите полека се повлекуваат, но и понатаму има случаи со тешки респираторни инфекции. Во моментов состојбата е многу постабилна, а најчестите интервенции се поврзани со секојдневни здравствени проблеми, болки во стомак, главоболки и покачен крвен притисок“, додава Каранфиловски.
Лекарите појаснуваат дека на почетокот на болеста се применува симптоматска терапија, додека пациентите кај кои состојбата се влошува се пренасочуваат кон соодветните болнички оддели.
Како превентивна мерка, Каранфиловски препорачува внес на доволно течности, топли напитоци, витамини и минерали, редовни оброци и одмор, со цел полесно и побрзо закрепнување. Здравствените работници апелираат граѓаните и понатаму да бидат внимателни, особено хронично болните.
