Привлекување инвестиции, структурирање финансиски инструменти, поддршка на старт-апи и на компании од двете земји, соработка на полето на иновациите, заеднички проекти пред европските фондови и програми, како и зголемување на трговската размена, се темите на денешниот прв состанок на македонско-бугарската Работна група за економија, трговија и иновации. Работната група ја предводат министерот за финансии Фатмир Бесими и министерот за иновации и раст на Република Бугарија, Даниел Лорер.
„Оваа втора средба на владините делегации на Северна Македонија и Република Бугарија, организирана за краток временски период, ја покажува подготвеноста за продлабочување и зајакнување на економската соработка меѓу двете земји“, напиша министерот Бесими по почетокот на состанокот.
Двете влади формираа четири работни групи – за економија, трговија и иновации, за инфраструктура, транспорт и поврзување, за европска интеграција и зелени политики и за култура, наука и образование. Историските прашања ќе ги разгледува веќе постојната Мешовита македонско-бугарска комисија за историски и образовни прашања. Планирано е секоја недела состанок да одржува една од овие групи, од кои секоја во својата сфера ќе придонесе за зајакнување на соработката меѓу двете земји.
