Како што објавија бугарските медиуми, реферирањето на Петков ќе се одржи на барање на најголемата опозициска партија Граѓани за европски развој на Бугарија (ГЕРБ) на поранешниот бугарски премиер Бојко Борисов и ќе биде прва точка на собраниското пленарно заседание закажано за в петок.
Петков и премиерот Димитар Ковачевски по заедничката седница на двете влади што се одржа во Софија оценија дека атмосферата на изразена политичка волја и духот на искреност и отвореност што преовладува на досегашните средби, водат кон заеднички прифатливи решенија за прашањата од интерес на Македонија и Бугарија.
На заедничката прес-конференцијата по седницата тие порачаа дека добрососедството ќе биде на пиедестал и ќе се посветат на работи што беа заборавени последните години, нагласувајќи дека договорите што беа потпишани имаат „еден краен резултат – економски развој на целиот регион“.
Со заедничката седница на двете влади, според двајцата премиери, се поставени основите за идниот брз напредок на меѓусебните односи и се прави обид преку конкретни договори да се зајакне соработката меѓу Скопје и Софија и тоа да придонесе и за пронаоѓање компромис за спорните прашања.
