Пендаровски, како што соопшти неговиот кабинет, изразил задоволство од посетата на специјалниот претставник Пич набрзо по неговото именување на функцијата во декември 2021 година. Посетата, како што оцени претседателот, е потврда за посветеноста на Обединетото Кралство за одржување на стабилноста и просперитетот на регионот.
На средбата се разговарало и за прашањата поврзани со членството на Македонија во Европската Унија и тековниот дијалог со Република Бугарија. Пендаровски го информирал Пич за напредокот на дијалогот помеѓу двете земји. Притоа се заблагодарил за интересот и поддршката на Обединетото Кралство за македонско-бугарскиот дијалог и подвлекол дека надминувањето на блокадата за почеток на пристапните преговори со Европската Унија ќе внесе дополнителна предвидливост и стабилност на Западниот Балкан.
Соговорниците, меѓу другото, разговарале и за одличната билатерална соработка меѓу Македонија и Обединетото Кралство и можностите за зајакнување на соработката меѓу двете држави и за обезбедување натамошна британска поддршка во повеќе области и форми.
