Отворајќи го настанот, Фатмир Сабриу, државен секретар во Министерството за социјална политика, демографија и млади, рече дека Суперучилиштата се водечка програма на РИКО и дека се горди на успехот што го постигнале досега.
„РИКО и неговите партнери се горди што се запознаваат со новите 100 училишта кои се дел од 4-тиот циклус, а поточно денес, со рекорден број 23-те наградени училишта од Северна Македонија. Со нетрпение ги очекуваме нивните инспиративни размени“, рече Сабриу.
Елена Ивановска, државен секретар во Министерството за образование и наука истакна дека мир, почит, пријателство и соработка се потребни за светот да оди напред.
„Ова се всушност вредностите на кои треба да ги учиме младите како во рамки на семејните заедници, така и во рамки на образовните установи. Идејата на РИКО е комплементарна со ова што го говорам, ги поддржува напорите за градење на генерации кои ќе сакаат да бидат обединети и со идентична цел – да го трансформираат регионот во подобро, посреќно и просперитетно место за живеење“, рече Ивановска.
Александру Албу од Делегација на ЕУ во Македонија , ја потврди континуираната поддршка на Европската Унија во поглед на отворање повеќе можности за младите во регионот како програмата за размени, сподели нови повици и простор за младите да бидам вклучени во нивните заедници, членувајќи во тела кои им даваат право на консултација за работи кои ги засегаат.
Кевин Маас од Амбасадата на Сојузна Република Германија во Македонија. ја потенцираше важноста на младите луѓе да бидат отворени за спознавање на сличностите наместо различностите, и се третираат едни со други со почит, сите победуваат на крајот, и програмата Суперучилишта игра голема улога во тоа.
Освен презентирање на идеи за проекти, настанот послужи и како можност за претставниците на избраните училишта подобро да се запознаат и да се вклучат во дискусии со клучните локални и меѓународни партнери на проектот „Суперучилишта“, како и да дознаат повеќе за следните чекори во процесот на имплементација на размена.
Претстојните активности за размена ќе се спроведуваат од 15 ноември оваа година до 15 април следната година. Во овој период, директорите на училиштата и наставниците ќе ги координираат и развиваат овие активности со поддршка на RYCO и неговите ментори. Можете да го видите списокот од 100 средни училишта од регионот, вклучувајќи 23 од Северна Македонија, на веб-страницата на RYCO.
За време на фазата на имплементација, секое партнерско училиште ќе организира една размена во другото партнерското училиште во траење до 6 дена, при што учениците ќе патуваат придружени од еден или двајца наставници. Преку програмата за размена, учениците и наставниците ќе имаат можност да патуваат, да се претстават себеси, своите училишта и обичаи на своите домаќини и да научат нови работи за локалните заедници низ целиот регион. Повеќе од 100 предлози за размена беа поднесени за 4-тиот отворен повик на Суперучилишта, кој стави посебен акцент на концептот на сместување во семејства – единствена можност за учениците и училиштата да учествуваат во билатерални размени во рамките на нивните локални заедници и домови. Во овој повик, 13 партнерства имплементираат сместување во семејства.
