Од МОН во реакцијата посочуваат дека платите на наставниците и директорите во основното и средното образование од овој месец се зголемени за седум отсто и ова е, како што велат, второ зголемување во мандатот на актуелната влада, откако претходно во октомври 2024 година биле зголемени за пет отсто.
„Повеќе никој не зема плата под минималната, како што беше тоа случај во минатото со техничкиот персонал. Оваа реакција на Министерството за образование и наука е поттикната од лагите кои денеска ги изнесе политичката партија Левица, за наводно енормно зголемување на платите на директорите на основните и средните училишта, споредбено со зголемувањето на платите на наставниот кадар. Платите на директорите и наставниците се зголемени во просек од околу 2500 до 3500 денари, во зависност од звањето, стажот и степенот на образование“, велат од министерството.
Од МОН потсетуваат дека веќе е направен план за долгорочен раст на личните примања кои во период од четири години ќе пораснат најмалку за 46 отсто, а најмногу до 60 отсто, зависно од степенот на инфлација.
„Левица оспорува договор помеѓу социјални партнери, односно институција и синдикат и изразува непочитување кон нив, како и кон целата јавност со обидите за манипулација и собирање политички поени“, посочуваат од Министерството за образование и наука.
Од Левица денеска преку соопштение оценија дека училиштата се борат со недостиг од кадар, а наставниците работат за половина од платата што ја заслужуваат.
„Од овој месец, платата на директорите е зголемена за до 45 отсто повеќе од основната плата на наставник, наспроти скромните 7 отсто покачување за просветните работници. Во услови кога наставниците и стручните соработници, кои работат со недоволни ресурси и ниски примања, селективното наградување на раководниот кадар испраќа недвосмислена порака на непочитување и дискриминација. Дали Јаневска смета дека сè поголемото незадоволство на просветните работници може да биде загушено низ притисоците кои ќе треба да ги испорачаат партиски назначените директори?!“, прашаа од Левица.
Побараа итно урамнотежување на платите за сите вработени во образованието и транспарентност во образложението на приоритетите во образовните политики.
