Дрвјата се наоѓаат во високите делови на Шар Планина на надморски височини од 1.700 до 1.900 метри, на терени со калциски и доломитни почви. Живеалиштето е од фрагментиран карактер, распослан под врвните делови на локалитетот Плат, но и локалитетот Јелачки Врв.
„Преземањето соодветни мерки за заштита е клучно за долгорочниот опстанок на ‘pinus peuce’ во Национален парк ‘Шар Планина’ “, се вели во извештајот од спроведениот мониторинг.
„Се препорачува контрола на сите антропогени активности, особено оние кои можат да предизвикаат пожар и загуба на видот, заштитата на калциските и доломитните почви за неговото опстанување, контролирано користење на водните ресурси во локалитетот Лешница за да се намалат негативните ефекти од недостаток на вода и суша врз видот, да нема комерцијални активности за користење на дрвна маса од овој вид“, се дел од мерките за заштита.
Заштитата и опстанокот на видот да бидат едни од приоритетите при изработката на посебните планови за одгледување и заштита на шумите во таа шумско стопанска единица, се дел од препорачаните мерки за заштита.
„Рехабилитација на деградирани терени: на места каде што популациите на ‘pinus peuce’ се намалени, потребно е да се изврши рехабилитација на екосистемот преку засадување нови примероци од видот. За ова, потребно е да се користат садници со генетска разноликост, со цел да се обезбеди најдобра адаптација на новите услови“, се вели во извештајот на НП „Шар Планина“ во делот на мерките за заштита.
Стручните лица посочуваат дека потребно е и подигнување на свеста кај локалните заедници и посетителите на паркот за важноста на моликата и заштитата на неговото природно живеалиште. Организирање на кампањи и едукативни програми кои ќе им помогнат на локалните заедници да разберат колку е важен овој вид за регионалниот еколошки систем.
Досега беше познато дека овој ендемски вид на бор – молика е карактеристичен само за падините на Пелистер.
