Наставните програми ќе се менуваат од септември и учениците од септември, рече таа, „ќе имаат нови учебници за средно гимназиско“.
„За концепцијата ќе имаме приближно една година време за да ја стокмиме така како што треба да изгледа и да биде соодветна на програмите од Европска Унија за нашите гимназијалци, кои ќе го продолжуваат школувањето овде, а дел од нив и во странство, да се подготвени на соодветното ниво за понатамошното образование“, рече Јаневска, одговарајќи на новинарски прашања по отворањето на клубот Иноваториум во Титан УСЈЕ.
Предлозите што стигнале до Бирото за развој на образованието „се однесувале, генерално, на зголемен број на часови на секој од предметите и дополнување на дополнителни предмети“. Доколку би се зеле предвид тие предлози, учениците би останувале на училиште и до 11 часови.
„Кога Бирото го направи распоредот на часови, според барањата на стручната јавност, здруженијата на наставниците, излезе дека учениците секоја година, од прва до четврта, треба да бидат на училиште најмалку 10 до 11 часа. За да нема забуна – 10 до 11 саати во работниот ден. Тоа не е можно и жал ми е што нема да можеме баш така како што поединечно замислуваат да го остваруваме. Сето тоа ќе треба да се изанализира, искомбинира. Да, нашите деца да бидат подолго на училиште, тоа што Владата како проект го предлага, но тие не може да бидат 11 саати во денот на часови, истакна министерката, додавајќи дека покрај наставни часови тие треба да имаат и воннаставни активности“, рече Јаневска.
Јаневска соопшти дека во моментов во 141 училиште низ државава е воведена едносменска настава – процес што тече паралелно со проектот за оптимизација на училишната мрежа односно малиот број ученици, кои се изолирани во подрачни училишта, да бидат преместени во централните училишта. За таа цел се прават планови за доградба на училници или, во некои општини како Аеродром, Кисела Вода и Чаир, изградба на нови училишни објекти.
Таа денеска уште кажа дека освен на два факултети, цената на трошоците на студентите е секаде спуштена на минимум.
Во изјава за медиумите таа кажа дека секој ден е во комуникација со академската заедница, како што рече – не само за студентскиот стандард.
„Комуницирав со сите декани од УКИМ и цената е секаде спуштена на минимум. Некаде изнесува нула, некаде изнесува 2.000 денари за цела година. Освен на два факултета, каде што е навистина неопходно да се обезбедат дополнителни средства за подобрување на студиските програми. Денеска имаме состанок, ќе видиме како ќе заврши сето тоа“, изјави Јаневска одговарајќи на новинарски прашања.
Универзитетското студентско собрание при УКИМ (УСС-УКИМ) неодамна соопшти дека воведувањето дополнителни трошоци за материјални и онлајн ресурси на некои факултети не треба да бидат на товар на студентите и поради тоа побара итен состанок со министерката, со цел, како што наведе, „во најбрз можен рок дополнителните трошоци да бидат надоместени од државниот буџет, како што е предвидено согласно законот“.
На прашање кога би профункционирал електронскиот индекс како најавен проект, Јаневска одговори дека е „можеби преамбициозно да биде на сите факултети“. Како што рече, „имаме добра шанса и важно е да почнеме, а потоа продолжуваме“.
Притоа посочи дека мобилната апликација за е-дневник која МОН ја промовираше завчера, била попосетена и од апликацијата ТикТок.
„Изработена е од стручниот тим во МОН и со гордост го соопштувам тоа“, додаде министерката.
