Во недопрената природа на Кожуф планина, над Смрдлива Вода, се планира изградба на две мали хидроцентрали на реката Дошница, една од најчистите и недопрените реки во Македонија.
Овие хидроцентрали, иако административно спаѓаат под Општина Кавадарци, ќе имаат директно негативно влијание врз снабдувањето со вода, живиот свет и природните ресурси во Гевгелија, Демир Капија, Неготино, Росоман и пошироко. Сите пиеме вода од истата планина, Кожуф, велат организаторите на протестот.
„Конска Река (Гевгелија) веќе е пресушена. Под закана се и Кранска, Крива, Тополка, Каменичка, Брајчино, Бачишка и многу други планински реки. Дали ќе дозволиме Дошница да биде следната?
Ние, граѓани, активисти, еколошки организации, планинари и заштитници на природата, решително се спротивставуваме на изградбата на мали хидроцентрали (МХЕ) на реката Дошница и нејзините притоки. Овој проект го загрозува екосистемот и снабдувањето со питка вода, уништува економски, културни и рекреативни вредности, спротивен е на националните и меѓународните закони за заштита на природата.
Бараме итно и трајно стопирање на проектите за МХЕ на Дошница. Почитување на Еспо и Бернската конвенција. Бараме отворање на документацијата и вистинска јавна расправа. Не ги прифаќаме ‘зелените’ лаги и злоупотребата на европски субвенции што се користат како параван за алчни концесии под изговор на ‘одржлива енергија’, а само ни ги сушат реките, ни ги касапат планините и ни ја крадат иднината.
Овие мали хидроцентрали произведуваат занемарливо малку струја, а за возврат го убиваат целиот екосистем. Поткрепено со многу примери во Македонија според еколошките студии, речиси сите мали хидроцентрали во земјава ја пресушуваат реката во деловите каде се поставени! Ова не е развој, ова е крајно неразумно расфрлање со ограничените ресурси со кои располагаме како држава и од кои ни зависи животот во неа. Македонија има ограничени ресурси на питка вода, со многу мали водотеци и климатска ранливост. Секое одвлекување на вода преку цевководи значи ризик од губење на уште еден извор на чиста вода и за нас и за сите следни генерации.
Во Дошница живеат ендемски видови риби и инсекти, меѓу кои и автохтоната македонска пчела (Apis mellifera macedonica) – еколошко богатство што може да го изгубиме засекогаш. Затоа Дошница не ја даваме! Питката, чиста вода не ја даваме“, велат организаторите на протестите: граѓанските иницијативи Зелена народна стража, Спас за Дошница, Спас за Прилеп, Млади за Македонија, Точак клуб Гевгелија, За почиста Македонија, Yes for Less, Аква фортис, МК-СИРК (Македонски студенти за истражување и развој од космосот), здруженија и активисти од Тиквешијата, од Гевгелиско-валандовскиот регион и еко-активисти од цела Македонија.
