Јубилејот на БРО, кој е орган во составот на МОН, го честиташе министерката за образование и наука, Весна Јаневска, нагласувајќи дека денот е значаен и за наставниците и учениците и за сите кои се дел од образовниот систем.
Во изјава за медиумите пред свеченоста, Јаневска им се заблагодари на сите вработени во БРО, сега и во минатото, „за нивната многу значајна работа која придонесува за унапредувањето и за квалитетот на знаењето“.
„Како било во минатото не би навлегувала, сум имала и позитивни и негативни ставови, но во овие 18 месеци откако МОН соработува со БРО, навистина имаме совршено добро согласување за тоа како треба да изгледа нашето образование, за постигнувањата на учениците, за едукацијата на наставниците, за промената на наставните планови и програми, за концепциите – одлично ни оди согласувањето. Оттука очекувам, после извесен период, да постигнеме заеднички големи успеси. Ниту Министерството за образование и наука, ниту другите образовни институции, можат да направат нешто без Бирото за развој на образованието“, изјави Јаневска честитајќи го јубилејот на БРО со желби за нови успеси.
Директорката на Бирото, Милка Тримчевска, изјави дека со особена чест и гордост го одбележуваат јубилејот од работата на Бирото кое, како што рече, „визионерски ги постави целите кон најквалитетно образование“.
„Покрај тоа што ја одбележуваме 70-годишната работа, им оддаваме почит и на вработените од минатото и сегашните, и им благодариме на институциите и организациите кои даваа максимална поддршка во текот на сите овие години, особено на МОН и министерката Весна Јаневска“, рече Тримчевска.
Во изјавата за медиумите, таа рече дека БРО сега има 152 вработени, но дека со оглед на значајноста на оваа институција, не може да кажат дека го постигнале максимумот во екипираноста.
„Во моментов имаме 152 вработени, но апсолутно треба да посветиме повеќе внимание во однос на екипирање советнци за конкретни предмети. Тоа е нешто што е поставено како цел на БРО и МОН, за да можеме да ги зајакнуваме овие капацитети. Затоа што, како што е и називот на институцијата, образованието го развиваме за нашите ученици, за наставниците вклучени во процесот и сметам дека зајакнувањето на капацитетите и компетенциите на постојните капацитети е од особена важност кон којашто целиме“, рече директорката на Бирото.
На прашање во врска со тековната јавна дискусија што ја организира БРО за измени на лектирниот список во основното образование, Тримчевска одговори дека добиваат премногу предлози.
„Добиваме премногу мејлови со предлози. До 30 ноември е отворен повикот, тоа секако нема да престане на 30 ноември, но мора да направиме еден пресек. Драго ми е што има особен интерес од многу наставници коишто се директни практичари во наставниот процес, но добредојдени се сите предлози кои се земаат предвод согласно критериумите што ги имаме поставено“, додаде Тримчевска.
На свеченоста им беа доделени благодарници на претставници на институции кои ја поддржуваат работата на БРО и беше промовирана монографија за 70-годишниот јубилеј од постоењето на Бирото.
