Денешната победа над Катар ја остави Македонија во игра за второто место, иако ќе биде премногу тешко да се дојде до него и да се избори пласман во четврт-финалето.
Нашата задача е најтешка, ние треба да ја победиме Франција, која цели на титулата. Олеснителна околност ни е тоа што Французите денеска ја заверија првата позиција, па не мораат да се потат за дуелот со нас. Имаме и една опција со реми да продолжиме понатаму.
Ако Македонија ја победи Франција, Холандија треба да ремизира или да загуби од Австрија, а Унгарија да претрпи пораз или да одигра нерешено со Катар
Ако Македонија одигра нерешено со Франција, тогаш Холандија и Унгарија треба да загубат од Австрија, односно Катар (во тој случај би решавала гол-разликата на Македонија и Унгарија и би биле подобри бидејќи моменталната е изедначена).
Последното коло се игра в сабота, први на терен ќе истрчаат Холандија и Австрија, па Катар и Унгарија и во вечерниот термин ќе се судрат Македонија и Франција.
