Првиот концерт на Влатко Стефановски во Македонската филхармонија е распродаден во рекордна брзина, а поради огромниот интерес е отворен дополнителен термин – 10 мај. Концертите ќе претставуваат пресек од неговата богата кариера – од деновите со култната група „Леб и сол“ до неговиот успешен соло пат.
Препознатливиот спој на инструментален рок, етно џез, блуз и македонска традиционална музика ќе добие нова димензија со специјалните гости, а публиката ќе ужива во изведбите на класици како „Чукни во дрво“, „Gipsy Song“, „Чувам ноќ од будни“, „Као какао“ и „Македонско девојче“. Дополнително, Стефановски неодамна го сними албумот „London Sessions“ во легендарното Abbey Road Studio 3 во Лондон, со врвни музичари, меѓу кои неговиот син Јан Стефановски на тапани и Тихомир Хојсак на електричен контрабас.
Снимањето и продукцијата ги водеше Горан Мартинац, а завршната обработка ја направи добитникот на Греми, Шон Меги. Албумот е достапен и во трипл-LP издание.
