„Со специјалните регистерски ознаки на државните службени автомобили ќе се спречи злоупотребата за приватни и партиски цели. Во изминатите шест години службени возила често пати беа видени како се користат за време на викенди, како се патува надвор од државата со нив, а за сето тоа немаше одговорност. За да го спречиме ова, сакаме да воведеме специјална боја на регистарските ознаки на службените автомобили со што точно ќе се знае кој државен автомобил каде се наоѓа во моментот и дали некој го употребува или злоупотребува. Ќе воведеме и специјален регистар на автомобили во државна сопственост со што точно ќе се знае кој автомобил во која институција е распореден. Сметаме дека така ќе се стави крај на злоупотребата на возилата“, истакна Андоновски.
Трошоците за изработка на новите регистарски таблички и за потребната документација би биле на товар на државните органи или институциите кои се сопственици на возилата.
„Планот сè уште не е целосно разработен, но тоа секако нема да биде на товар на граѓаните. Идејата не ни е да создаваме дополнителни обврски за нив или за државните институции, но мора да се заштитиме од злоупотреби“, додаде Андоновски.
Инаку, повозрасните граѓани сигурно се сеќаваат дека во времето на СФР Југославија државните возила имаа регистерски таблички во црвена боја, па така сите граѓани знаеја дека се работи за службено возило, а функционерите на кои им беа доделени сигурно беа повнимателни каде и колку ги користат.