Операторите на аеродромот планираат по 540.000 летови годишно, со над 80 милиони патници, а отворањето на првата фаза се очекува во 2035 година. „Најголемиот офшор аеродром во земјата полека се крева над нивото на морето, како изгревањето на сонцето на исток“, се наведува во објавата на аеродромот Далијан Џинжу беј интернешнал на кинеската социјална мрежа Вичет.
По завршувањето на изградбата ќе биде најголемиот аеродром на вештачки остров на светот. Со тоа ќе ги надмине аеродромите во Хонг Конг и јапонски Кансаи.
„Изградбата се соочуваше со големи предизвици. Проектот има сложени геолошки услови, високо ниво на тежина на дупчењето и големи барања за квалитет, со строг временски распоред на изградбата“, изјави во октомври Ли Сијанг, главниот инженер на компанијата Далијан ерпорт констракшн енд девелопмент. Далијан, град со 7,5 милиони жители, веќе долго време е важен сообраќаен јазол поради близината на Јапонија и Јужна Кореја.
Меѓународниот аеродром Далијан Жушуизи, кој работи веќе цел век, го достигнал својот максимален капацитет и неколку пати е прошируван во последните години. Градот почнал со бирање локација и студија за изградба на новиот аеродром уште во 2003, но изградбата во полн замав почнала пред само неколку години.
Новите аеродроми се клучен дел од растот на кинескиот авиопревоз. Кина е на пат да ги надмине САД и да стане најголемиот светски пазар за воздушен сообраќај. Вториот аеродром во Пекинг, Дасинг, беше отворен за јавноста на 1 октомври 2019, на 70-годишнината од формирањето на Народна Република Кина. Тогаш кинеските власти најавија дека на земјата ќе ѝ требаат 450 аеродроми до 2035 за да ја задоволи побарувачката.
