На денешната средба со новинарите присуствуваше и претседателот на Владата, Христијан Мицкоски, кој истакна дека посетите на општините ќе бидат корисни од повеќе аспекти. Ќе се слушнат и предлози и идеи за процесот за измени на Законот за локална самоуправа, а од увидот на градежните активности на проектите финансирани од централниот буџет, локалните власти ќе можат да ги пренесат искуствата и потребите во пресрет на очекуваниот втор јавен повик, рече премиерот.
Министерот Перински рече дека со непосреден контакт и градење на партнерство помеѓу власта и граѓаните ќе се најдат механизми и соодветни решенија за да се надминат сите препреки со кои се соочуваат локалните саоуправи.
„Императив ни е градењето на партнерски однос со граѓаните. За нас, нивниот интерес е пред сѐ и над сѐ“, рече Перински.
„Каде што срцето е дома“ во наредниот период ќе ги посети сите скопски општини, а ќе се реализираат средби со градоначалниците, членовите на општинските совети, со невладини организации, бизнис секторот, културни, спортски работници, воопшто со сите заинтересирани граѓани, а ќе се врши увид и на проектите финансирани од централниот буџет.
Планирани се и еднодневни посети на Кочани, Охрид, Битола, Тетово, Струмица, Кавадарци, Велес, Куманово, Штип и Прилеп, на кои ќе се вклучат и претставници од општините од регионот.
Премиерот Мицкоски изрази задоволство од посветеноста на Министерството за локална самоуправа за развој на општините, што заедно со владините мерки е показател дека власта создава услови за поквалитетен живот на сите граѓани.
„Проектите се дел од владината програма за инвестиции во општините. Добро е овој процес да поминува транспарентно и добро е граѓаните одблиску да го дознаваат она што ќе го работиме како Влада преку соодветните министерства, а целиот процес го координира Министерството за локална самоуправа“, истакна Мицкоски.
