Како што се наведува во соопштението на Јавното обвинителство, 20-годишниот возач не се придржувал кон прописите и со тоа го загрозил јавниот сообраќај.
„Автомобилот го управувал без возачка дозвола и под дејство на алкохол со 0,82 промили присуство на алкохол во урина, со што го довел во опасност животот на луѓето. Кога дошол пред обележан пешачки премин на крстосницата со ул. 29-ти Ноември, не ја приспособил брзината на движење на возилото спрема својствата и состојбата на патот и сообраќајот и другите сообраќајни услови за да може навремено да го запре возилото пред секоја пречка.
Пред пешачкиот премин регулиран со семафори кои за време на незгодата работеле исправно, продолжил со движење на вклучено црвено светло на семафорот и со предниот лев дел од возилото удрил во телото на пешакот-жртва, Фросина Кулакова, која на обележан пешачки премин попречно ја преминувала коловозната лента. Од ударот оштетената се здобила со тешки телесни повреди од кои на лице место починала“, се вели во соопштението на ЈО.
Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничениот.
Во јавноста веќе се појавија сознанија дека возачот на автомобилот и порано предизвикал сообраќајка која резултирала со тешки телесни повреди на учесниците. И тогаш бил виновен за сообраќајката, немал возачка дозвола, а добил и кривична пријава од МВР за серијата на кривични дела, но пријавата била одбиена од страна на Основното јавно обвинителство Скопје.
Евиденцијата покажува дека во изминатите две години тој има добиено повеќе од 10 прекршочни пријави од сообраќајната полиција за управување без возачка дозвола, брзо возење и кршење на сообраќајни правила.
Освен за предизвикување сообраќајни прекршоци и незгоди, 20-годишникот кој ја усмрти младата Фросина Кулакова во неколку наврати во изминатите години од полицијата бил апсен со помала количина на дрога, но затоа што количината била мала тој излегувал од полиција со образложение дека е зависник кој ја користи за сопствена употреба. Но во март 2024 година, при полициски претрес во неговиот дом биле пронајдени над 80 пакувања со амфетамин и за тоа добил кривична пријава за недозволена трговија со дрога.
„ОЈО Скопје поднесе обвинение со предлог за продолжување на мерката притвор која по предлог на обвинителството беше определена од самиот почеток на постапката, и тоа за две кривични дела од член 215 од Кривичниот законик – ‘неовластено производство и пуштање во промет наркотични дроги, психотропни супстанции и прекурсори’. Основниот кривичен суд Скопје донесе пресуда со која на обвинетиот му изрече – заводска мерка упатување во воспитно -поправен дом Тетово, третирајќи го сторителот како помлад полнолетник. Во текот на целата постапка, токму по предлог на јавниот обвинител лицето беше во притвор, а при изрекување на пресудата судот ја укина притворската мерка за обезбедување. Незадоволен од пресудата, имајќи го притоа предвид и претходното поведение на сторителот, јавниот обвинител вложи жалба и предметот е во жалбена постапка“, се вели во соопштение на Јавното обвинителство.