четврток, 29 февруари 2024
Форин полиси

Исламска држава има нова цел: Русија

Објавено на

часот

Сподели

Сега кога американските сили го напуштија Авганистан, локалниот разгранок на групата ИСИС го насочи својот нишан кон нов непријател: Русија, заклучува анализата на Форин полиси на Лукас Вебер, Рикардо Вале и Колин Кларк.

Набргу откако руските сили почнаа да ја напаѓаат Украина на 24 февруари 2022 година, централниот пропаганден апарат на ИСИС во неделниот билтен ал-Наба покрена медиумска кампања насочена кон Украина, насловена „Војните меѓу крстоносците“, во која групата му се ситеше на меѓусебното уништување на нејзините непријатели на европскиот континент.

„Оваа крвава војна што се води денес меѓу православните крстоносци – Русија и Украина – е пример за казната што им е фрлена и засекогаш залепена за нив.“ Конфликтот, се тврди во написот, е за моќ и „манифестација на сѐ пожестоката трка меѓу Америка и Русија за контрола над источноевропските земји“. ИСИС вели дека „војните меѓу крстоносците“ допрва почнуваат, а написот завршува со апел: „О Алаху, направи ги нивните војни крвави и всади раздор во нивните срца; излеј ги врз нив својот гнев и маки“.

По написот на ал-Наба, централните пропагандни медиуми на ИСИС се префрлија на други прашања; сепак, медиумските групи што ја поддржуваат ИСИС го продолжија тој дискурс и продолжија да произведуваат своја содржина. Во летото 2022 година авганистанскиот разгранок на групата, познат како Исламска држава Хорасан (ИСИС-Х), именуван според историскиот регион што ги опфаќаше североисточниот дел на Иран, јужен Туркменистан и северен Авганистан, се појави како водечки глас за руско-украинската војна и почна да води кампања за користење на конфликтот што доминира во дневните наслови на светските вести.

„Рацете на Москва се покриени со муслиманска крв“

Русија им е познат непријател на сунитските џихадисти и се најде на нишанот на ИСИС-Х од неколку причини. Според ИСИС-Х, рацете на Москва се покриени со муслиманска крв, особено во Авганистан, каде што сѐ уште демнат последиците од повеќедецениската советско-авганистанска војна. Наративите на ИСИС-Х често посочуваат на историската вплетканост на Русија во Авганистан и актуелните односи со талибанците, нагласувајќи го лобирањето на Москва кај талибанците за да добие пристап до Авганистан, додека за возврат талибанците се надеваат на меѓународно признавање и поддршка.

Понатаму, бруталните тактики на руската војска во повеќе чеченски војни и нејзините разорни напади врз бунтовниците во Кавказ значи дека таму нема голема љубов кон Русија. Континуираната помош на Кремљ за озлогласениот диктатор Башар ал-Асад во Сирија, каде што руската воздушна поддршка ги гаѓаше сунитските упоришта за време на долготрајната граѓанска војна, го зацврстува имиџот на Русија како непријател вреден за фокусирање. Сѐ заедно, овие фактори ја прават Русија атрактивна цел за пропагандата на ИСИС-Х.

Фондацијата на ИСИС-Х за медиумска продукција, ал-Азаим, е иновативна и умешна организација, која сè повеќе ги користи геополитичките прашања за да ја унапреди својата агенда. За ИСИС-Х, копнените операции во регионот „Хорасан“ и информациската војна заемно се надополнуваат; како таква, целта на медиумската офанзива на ал-Азаим е да го разгори гневот на муслиманите поради социополитичките и економските поплаки против владите на нивните земји со цел да привлечат поддржувачи. ИСИС-Х, исто така, се обидува да ги поттикне антируските чувства поради војната на Москва во Авганистан во минатото и сегашната поддршка за сирискиот режим, апелирајќи до муслиманите што ја гледаат Русија како долгогодишна закана за исламот.

„Борењето во Украина не е исто со џихадот“

Првата порака на ИСИС-Х во која се споменуваше Украина беше објавена од групата на 10 март 2022 година, само две недели по избивањето на конфликтот. Во соопштението објавено по разорниот напад на групата врз шиитското светилиште во Пешавар, Пакистан, последниот дел од текстот накратко се осврнува на војната во Украина.

д

Но ова споменување беше важно поради предупредувањето до муслиманите што се борат на двете страни дека учеството во овој конфликт не е исто што и учеството во џихад. На овој начин, ИСИС-Х има цел да ги обезвредни борбите на другите џихадистички организации како неисламски, признавајќи ја само сопствената војна за оние што се сметаат себеси за вистински верници.

На 3 август 2022 година ИСИС-Х објави издание на своето водечко списание на англиски јазик, Гласот на Хурасан (Voice of Khurasan), кое содржи напис со наслов „Црната дупка во Украина“, прославувајќи ја војната како „голема, голема добра вест за муслиманите низ целиот свет“.

„Војната што избива меѓу куфарите (неверниците)“, според ИСИС-Х, е „голем знак од Семоќниот Алах“.

Зборувајќи за двете големи сили, САД и Русија, кои водат индиректна војна, ИСИС-Х тврди: „Америка му беше лут непријател на исламот во изминатиот век, а Русија не се покажа ништо поинаква“.

„Овој пат жртвите се жители на мирните земји во Европа“

Неименуваниот автор истакнува дека овој пат „жртвите не се муслимани од Чеченија, ниту од Авганистан, ниту од Сирија“, туку жители на „мирните земји во Европа“. Групата се пофали дека овие „крстоносни влади што ја водат својата терористичка војна против исламот, јасно ја видоа војната токму во сопствените домови“. Текстот ги цитира зборовите на поранешниот лидер на ИСИС Абу Бакр ал-Багдади како пророчки, кога тој рекол: „Ви ветуваме – по милоста на Алах – дека секој што ќе учествува во оваа војна против ИСИС сигурно скапо ќе плати и ќе зажали поради тоа“. Одлуката да се цитира Багдади, првиот самопрогласен калиф на ИСИС, има цел да му даде дополнителен легитимитет на соопштението на групата и да пренесе чувство на алармантност до оние што го слушаат.

Друга претходна оригинална статија на ИСИС-Х за војната во Украина беше објавена на 14 август 2022 година, на каналот на групата на јазикот фарси, ал-Фурсан медиа. Статијата ги повикува муслиманите да бидат трпеливи и да чекаат прилика да ги нападнат непријателите, вклучително и Русија, искористувајќи ги сегашните превирања. Потоа, во октомври 2022 година, фондацијата ал-Азаим објави краток текст на руски јазик под наслов „Заповедта за војната во Украина“. Во директно обраќање до муслиманите што се борат за Украина и за Русија, се вели дека на муслиманите им е забрането да се борат за неисламски владетел. Понатаму се тврди дека војната во Украина е уште една шема измислена од Западот за да создаде поделби меѓу муслиманите, и затоа верниците не треба да се мешаат и наместо тоа треба да отстапат и да остават двете страни да се уништат една со друга.

„Татарските муслимани соработуваат со нацистички режим“

Последниот пропаганден текст од ИСИС-Х на оваа тема беше објавен во изданието 24 на Гласот на Хурасан на 2 април. Текстот со наслов „Порака од срце до нашите браќа муслимани во Украина“ наводно го напишал анонимен поддржувач на ИСИС-Х што живее во Европа. Текстот им се обраќа на муслиманите што се борат на двете страни од конфликтот во Украина – конкретно, чеченските муслимани на руска страна и татарските муслимани на украинската страна – и ги повикува да се воздржат од борби, да ѝ се приклучат на ИСИС и да ја пренасочат оружената борба кон руските трупи во Сирија. Написот го напаѓа и актуелниот чеченски лидер Рамзан Кадиров, кого авторот го опишува како „вулгарен“ и „лицемерен“, обвинувајќи го дека е алатка на рускиот претседател Владимир Путин поради неговата улога во испраќањето чеченски војници да се борат во Украина.

д

Авторот потсетува на создавањето на „Кавкаски вилает“ од страна на Багдади – франшизна група на Исламска држава што покрива територија низ Северен Кавказ – која требаше да стане лансирна рампа за напади во Русија и Чеченија, како и на Западот. Авторот сугерира дека вистинските муслимани не треба да се борат во војна меѓу неверниците, туку наместо тоа да се посветат на оживување на способноста на Исламска држава да врши напади против руските сили во Чеченија, Дагестан и низ јужна Русија. Слично на тоа, авторот го исмева создавањето на „муслиманскиот баталјон“, мислејќи на татарските муслимани што се борат во единици за Украина и ги обвинува за соработка со „нацистички режим“ – повторувајќи ја тезата на Кремљ и клеветејќи го украинскиот претседател Володимир Зеленски. Наместо тоа, написот тврди дека ако Татарите, Чеченците и воопшто муслиманите сакаат да се борат против руските сили, тие треба да му се приклучат на Кавкаски вилает.

Медиумскиот институт тесно соработува со пропагандните групи што се наклонети кон Исламска држава, кои често објавуваат постови за војната во Украина. Освен тоа, фондацијата за медиумска продукција на ИСИС-Х ал-Азаим и придружни изданија објавуваат преводи на официјалната пропаганда на Исламска држава, како и оригинални содржини на руски јазик, за да гради поддршка, да регрутира, да собира пари и да поттикнува насилство меѓу руските муслимани.

Акции во реалниот свет

Медиумската кампања беше придружена со акции во реалниот свет. Во септември 2022 година бомбаш-самоубиец на ИСИС-Х ја нападна руската амбасада во Кабул, убивајќи двајца вработени и четворица авганистански цивили. Иако немаше големи операции на ИСИС-Х против Русија или руските интереси во Авганистан по нападот на амбасадата, порастот на пропагандата покажува дека намерата останува да се тргне по Русија. Обично постои задоцнет ефект од напливот на пропаганда врз реалните терористички сценарија и напади, така што идните напади против руски персонал или руски цели во Авганистан или во поширокиот регион не би биле изненадување, велат авторите на Форин полиси.

Додека Русија, Кина, Иран и други земји се обидуваат да го пополнат вакуумот на моќ во Авганистан по повлекувањето на САД, тие сè повеќе би можеле да се фатат себеси како предмет на гневот на ИСИС-Х и другите џихадистички групи. Со Русија, ИСИС-Х можеби веќе намирисува крв во водата. Воените неуспеси на Москва во Украина покажуваат колку е растегнат Кремљ на бојното поле. Ова може да ги поттикне историски немирните области на периферијата на Русија да бараат можност за обновување на оружените напади против Русија, особено во места како Дагестан, Ингушетија и други делови на Северен Кавказ. Со поттикнувањето на џихадистите да ја напаѓаат Русија, ИСИС-Х се обидува да создаде нов залет, особено во време кога јадрото на Исламска држава во Сирија е разорено од агресивните антитерористички напори на САД, се заклучува во текстот на Форин полиси.

ТОП ВЕСТИ

ПОСЛЕДНИ ВЕСТИ