среда, 26 февруари 2025

Храна што треба да ја вклучиме во исхраната кога сме под стрес

Стресот е неизбежен дел од животот, но клучно е како да се справиме со него. Воведувањето одредени намирници во вашата исхрана може да помогне во намалувањето на стресот.

Фото: Пиксабej

Објавено на

часот

Сподели

Доктор Раџ Дасгупта советува дека тоа што го јадеме може да влијае на начинот на кој телото реагира на стрес. Затоа, за да се олесни ова, докторот ја нагласува важноста на хранливите материи како магнезиум и омега-3 масните киселини, кои го поддржуваат нервниот систем и го намалуваат воспалението.

Невропсихологот Санам Хафез додава дека хроничниот стрес го осиромашува магнезиумот и витамините Б, додека здравата исхрана помага да се стабилизира шеќерот во крвта, да се намали воспалението и да се одржи здравјето.

Стресот често нè тера да посегнеме по храна која обезбедува краткорочно олеснување, но штети на долг рок. Белото брашно и шеќерот привремено ги зголемуваат серотонинот и допаминот, но на долг рок предизвикуваат нестабилен шеќер во крвта, воспаление и недостатоци во исхраната, објаснува Хафез. Не е неопходно целосно да се елиминира нездравата храна, но треба да се консумира умерено и да не се користи како главна алатка за ослободување од стресот.

Еве неколку намирници кои лесно се вклучуваат во вашата исхрана и кои можат да му помогнат на вашето тело да се справи со стресот.

Темно чоколадо

Богато е со антиоксиданси и магнезиум, му помага на телото да се опушти и го подобрува расположението. „Едно мало парче може да биде одлично задоволство во стресните моменти“, вели доктор Дасгупта. Темното чоколадо, кое е побогато со какао и со помала содржина на шеќер од млечното, дополнително го зголемува нивото на серотонин.

Житарки од цело зрно

Житарките од цело зрно, како овесот, се богати со хранливи материи кои го стабилизираат шеќерот во крвта, спречуваат промени во расположението и поттикнуваат смиреност. „Одлични се за одржување стабилна енергија и подобрување на расположението“, истакна докторот.

Јаткасти плодови и семиња

Бадемите, чиа семките и оревите се богати со здрави масти и магнезиум што го регулира расположението. Хафез нагласува дека секојдневното консумирање на грст јаткасти плодови може значително да го намали ризикот од депресија.

Лиснат зеленчук

Лиснатиот зеленчук како спанаќот, кељот и блитвата се богати со магнезиум, кој помага да се контролира стресот и да се подобри сонот.

Риба богата со здрави масти

Лососот и скушата се богати со омега-3 масни киселини, кои го намалуваат воспалението и кортизолот и го подобруваат здравјето и расположението на мозокот. „Редовното консумирање масна риба има долгорочни придобивки за менталното здравје“, објаснува Дасгупта.

Бобинки

Боровинки, малини и капини се богати со антиоксиданси кои го намалуваат воспалението, го штитат мозокот и помагаат во борбата против стресот. „Нивните хранливи материи можат да го подобрат фокусот и смиреноста“, додава Хафиз.

Билни чаеви

Билните чаеви, како камилица и нане, не содржат кофеин и затоа не го нарушуваат сонот и не предизвикуваат нервоза. Хафез објаснува дека овие чаеви се смирувачки и можат да создадат чувство на благосостојба.

ТОП ВЕСТИ

ПОСЛЕДНИ ВЕСТИ