Либанскиот министер за информации Зиад Макари го осуди детонирањето на пејџерите – рачни уреди што ги користат Хезболах и други во Либан за испраќање пораки – како „израелска агресија“. Хезболах рече дека Израел ќе добие „праведна казна“ за експлозиите.
Израелската војска, која е ангажирана во прекугранични борби со проиранскиот Хезболах од почетокот на војната во Газа во октомври, одби да одговори на прашања за детонациите. Бројот на загинати се зголеми од осум на девет вчеравечер, додека бројот на повредени остана на околу 2.750, соопшти либанското Министерство за здравство.
Во претходно соопштение, Хезболах потврди дека најмалку двајца негови борци и една млада девојка се меѓу загинатите. Пејџери експлодираа во јужен Либан, јужните предградија на Бејрут познати како Дахија и источната долина Бека – сите упоришта на Хезболах.
Во еден случај, на видео снимка од надзорна камера се гледа како лице плаќа во самопослуга, додека нешто што изгледа како мал рачен уред поставен до касата експлодира.
BREAKING: Thousands of messaging pagers used by Hezbollah reportedly exploded all across Lebanon in a cyberattack straight out of a cyberpunk scifi novel.
More than a thousand Hezbollah members have been reportedly injured, according to Lebanese security sources. pic.twitter.com/knnCUpSEO9
— Ian Miles Cheong (@stillgray) September 17, 2024
Официјален претставник на Хезболах, кој сакаше да остане анонимен, рече дека инцидентот е „најголемиот безбедносен пропуст“ на групата во речиси една година конфликт со Израел. Палестинската милитантна група Хамас, која води војна со Израел во Газа, рече дека експлозиите на пејџерите се „ескалација“ што само ќе го одведе Израел до „неуспех и пораз“.
Специјалната координаторка на ОН за Либан, Жанин Хенис-Плашерт, го осуди нападот во изјава и рече дека „означува исклучително загрижувачка ескалација“ во конфликтот. Вашингтон рече дека тој не бил вклучен во експлозиите и не знае кој е одговорен. САД повторно повикаа на дипломатско решение на тензиите меѓу Израел и Либан.
Тие го повикаа Иран – кој со своите сојузници Хезболах, јеменските Хути и вооружените групи во Ирак формираа „оска на отпорот“ против влијанието на Израел и САД – да не искористува каков било инцидент за да ја зголеми нестабилноста.
Не коментирајќи директно за експлозиите во Либан, портпаролот на израелската војска рече дека началникот на Генералштабот, генерал-мајор Херзи Халеви, се сретнал со високи офицери во вторникот вечерта за да ја процени ситуацијата. Не е најавена промена на политиката, но „мора да се продолжи да се одржува будноста“, рече тој.
Меѓу жртвите има и борци на Хезболах, кои се синови на највисоки функционери на вооружената група, изјавија за Ројтерс два безбедносни извори. Еден од убиените е син на Али Амар, член на Хезболах во либанскиот парламент, рекоа тие.
„Ова не е безбедносен напад врз едно, две или три лица. Ова е напад врз целата нација“, рече високиот функционер на Хезболах Хусеин Калил, изразувајќи сочувство за синот на Амар.
