„На француската амбасадорка ѝ изразив силно противење на Грција за таквата можност, што не е во согласност со досегашните одлични стратешки односи меѓу нашите земји“, изјави министерот за одбрана Никос Дендиас по средбата со француската амбасадорка Лоренс Оер.
Грчкото министерство се повика на информациите дека Франција е подготвена да ја снабди Турција со ракети воздух-воздух со долг дострел метеор, истиот модел што грчката војска го користи на своите борбени авиони Рафал. Грција веќе купи 24 борбени авиони Рафал од Франција и размислува да купи дополнителни шест.
Μετά τη σχετική ενημέρωση του Πρωθυπουργού κ. Κυριάκου Μητσοτάκη και του Υπουργού Εξωτερικών, κ. Γεώργιου Γεραπετρίτη, συναντήθηκα σήμερα στο ΥΠΕΘΑ με την Πρέσβη της Γαλλίας, κα Laurence Auer, από την οποία ζήτησα επίσημη ενημέρωση σχετικά με τις πληροφορίες για πώληση πυραύλων… pic.twitter.com/40XTNS9vyJ
— Nikos Dendias (@NikosDendias) January 29, 2025
Во меѓувреме, Вашингтон ја исклучи Анкара од програмата Ф-35, откако Турција одлучи да го купи рускиот систем за воздушна одбрана С-400, кој не е компатибилен со безбедносните стандарди на НАТО и може да ги загрози операциите на авионот Ф-35. Турција сега итно бара начини да ја компензира загубата на воздушната моќ во регионот на Егејското Море.
Не можејќи да го купи Рафал поради клаузулата за заемна одбрана во воениот договор меѓу Грција и Франција, Турција се сврте кон борбените авиони Еурофајтер, кои ги произведува конзорциум од Велика Британија, Германија, Италија и Шпанија.
Клучен проблем за Атина е тоа што ракетите метеор, кои имаат дострел повеќе од 100 километри, можат да се користат и на Еурофајтер, што на Турција може да ѝ донесе значителна стратешка предност. Грчката влада смета дека е контрадикторно земја која произведува вооружени системи да ги продава истите системи на две држави кои се во конфликт.
Во меѓувреме, Ла Трибјун претходно овој месец објави дека турскиот претседател Реџеп Таип Ердоган е подготвен да купи авиони Еурофајтер, но само под услов да добие и ракети метеор за да може да ѝ конкурира на грчката војска.
Извори од Атина нагласуваат дека со купувањето на борбените авиони Рафал, Грција ја поддржа Франција во чувствителен момент, откако Австралија го откажа договорот од 38 милијарди евра во 2021 година за купување француски конвенционални подморници како дел од безбедносниот договор АУКУС со САД и Велика Британија.
Во синоќешното телевизиско интервју грчкиот премиер Киријакос Мицотакис изјави дека не бил информиран оти Франција донела одлука да испорача ракети метеор на Турција. Сепак, тој додаде дека е можно Анкара да изразила интерес и дека министерот за одбрана можеби постапил превентивно контактирајќи ја француската амбасадорка.
Од друга страна, Елисејската палата не се огласи по ова прашање.
