Украина го прекина протокот на гас во Европа на почетокот на годината, откако заврши транзитниот договор меѓу Киев и Москва, со цел да се запрат приходите од енергија кои одат во Москва за финансирање на нејзината речиси тригодишна инвазија. Фицо вели дека овој потег ја чини Словачка, која граничи со Украина, повисоки цени на гас и загуба на таксите за транзит на гас понатаму во Европа, и бара обновување на протокот на гас.
Во отвореното писмо до Зеленски, објавено од неговиот кабинет, Фицо вели дека средбата може да се одржи во Словачка во близина на украинската граница и може да се искористи за разговори за технички решенија на проблемот. „Ваквиот состанок ќе создаде добра основа за отворена расправа за испораките на гас за Словачка и други земји преку украинска територија“, рече Фицо.
Фицо претходно рече дека е постигнат договор според кој испораката на гас преку Украина ќе продолжи така што прво ќе се промени сопственоста. Но, како што наведе, Зеленски отфрли продолжување на каков било проток на гас низ Украина на самитот на ЕУ во декември.
Фицо тврди дека Европа претрпела загуби од повеќе милијарди евра поради зголемувањето на цената на гасот предизвикано од недостигот на околу 13,5 милијарди кубни метри гас што минуваше низ Украина минатата година, вклучително и околу 3 милијарди кубни метри гас за потрошувачка во Словачка.
Зеленски попладнево на платформата Икс му одговори на Фицо. „Во ред, дојди во петок во Киев“, се вели во објавата.
