Според извештајот на ДЗР, во 2023 година, планирани биле вкупно 7.691 инспекциски надзори, од кои биле извршени 4.446, или 58 отсто од планираното.
„Од друга страна ДПИ располага со 138 систематизирани работни места, 100 се пополнети, што значи дека една третина од потребниот кадар не е пополнета. Најизразен недостаток има во секторот за инспекциски надзор и оценување на квалитетот, каде што недостасуваат просветни инспектори, што ја отежнува реализацијата на основната дејност, а посебно за подрачјето на општините Охрид, Гостивар, Кавадарци и Ресен, поради пензионирање на просветните инспектори. Исто така, дел од нововработените инспектори не ја завршиле неопходната обука, што носи ризик за грешки и слабости во работењето. Заедно со недостигот на техничко-административен кадар, овие проблеми ја нарушуваат ефикасноста на инспекцискиот надзор и ја отежуваат неговата целосна примена“, велат од ДЗР.
Законот за просветна инспекција ја регулира постапката за вршење на инспекциски надзор, при што еден од методите е интегралната евалуација на воспитно-образовните установи. ДЗР утврдил дека дел од основните и средните училишта не се опфатени со интегралната евалуација секоја трета учебна година, како што предвидува законот.
„Причините за оваа состојба се пандемијата со Ковид-19 во претходниот период, како и недостатокот на кадар, предизвикан од постојаниот одлив на просветни инспектори поради пензионирање или други причини. Ваквата состојба влијае на организацијата и реализацијата на наставата, условите во воспитно-образовните установи, како и на исполнувањето и вреднувањето на работните задачи на наставниците и стручните соработници“, се наведува во извештајот на ДЗР.
Во него уште се наведува дека во текот на 2023 година, Државниот просветен инспекторат, имајќи ја во предвид природата на својата дејност и дисперзираноста на субјектите под инспекциски надзор, располагал со пет службени возила во возна состојба. Поради недостигот на моторни возила и со цел да се зголеми функционалноста на институцијата бил донесен правилник за надоместок на патни трошоци при користење на сопствени возила за службени потреби, и по овој основ биле исплатени надоместоци за патни трошоци во вкупен износ од 1.021 илјади денари.
„Со извршената ревизија утврдени се неправилности кои влијаат на законскиот начин на користење на средствата за службените и сопствените возила за службени цели. Имено, најголем дел од патните трошоци се исплатени за дестинации на кои постои организиран автобуски превоз, бројни патни налози не се уредно пополнети, не се архивирани, недостасуваат податоци за изминати километри, а истите не се одобрени од непосредните претпоставени и не се изготвуваат писмени налози за користење службените возила. Исто така, со ревизијата се истакнува дека Државниот просветен инспекторат се соочува и со несоодветни услови за работа, недостаток на современа софтверска и ИТ опрема (харверд и софтвер)“, констатирале ревизорите.
Ревизијата утврдила слабости и во финансиското управување, вклучувајќи неусогласеност на сметкводствената евиденција со фактичката состојба, неправилности во евидентирањето на обврските кон добавувачите и расходи без соодветна документација, дополнително потенцирајќи го отсуството на ефективни внатрешни контроли.
Од ДЗР велат дека за утврдените состојби ревизијата дала препораки, чија имплементација би обезбедила надминување на истите.
Согласно законските одредби Државниот просветен инспекторат има обврска да врши инспекциски надзор најмалку еднаш годишно во студентските домови и да достави извештај доМинистерството за образование и наука и Владата во рок од 60 дена по завршувањето на сместувањето на студентите.
