Стармер ги опиша своите разговори со Бајден како „долги и продуктивни“, но одби да каже што одлучиле за потенцијалната украинска употреба на западното оружје против цели на руска територија.
На почетокот на вчерашната средба во Сината соба на Белата куќа во Вашингтон, Бајден на прашање за заканата на рускиот претседател за војна со НАТО одговори: „Не размислувам многу за Владимир Путин“.
На прашањето за одлуката во врска со потенцијалната употреба на ракети со долг дострел од Украина, Стармер им рече на новинарите: „Имавме долга дискусија за стратегијата во Украина, се разбира, на Блискиот Исток и во другите делови на светот. Ова не беше состанок за конкретните воени способности, не се сретнавме за тоа денес. Се сретнавме за да одвоиме време за стратешка дискусија за да ги разгледаме тактичките одлуки во рамки на една поширока стратегија“.
„Средбата беше продуктивна и донесовме одлуки. Многу сум задоволен што одржавме состанок“.
Стармер на почетокот на разговорите рече дека следните недели и месеци ќе бидат „клучни“ во Украина и дека е „важно“ Велика Британија и САД да продолжат да ја поддржуваат Украина во нејзината борба против Русија.
Состанокот дојде откако украинскиот претседател Володимир Зеленски ја изрази својата фрустрација поради континуираните ограничувања за употребата на западното оружје против руски цели.
По состанокот со британскиот министер за надворешни работи Дејвид Лами и американскиот државен секретар Ентони Блинкен, Зеленски во подолга објава на Икс напиша дека „прашањата зошто на Украина ѝ требаат доволно ракети со долг дострел не треба да останат неодговорени“.
Стармер му рече на Бајден во Белата куќа во петокот: „Историски, ја покажавме силата на нашиот однос. Стратешки сме усогласени и имаме заедничка цел за овие глобални прашања“.
