Адорни изјави дека управувањето со пандемијата од страна на СЗО и одлуките на поранешниот претседател Алберто Фернандез „ја доведоа Аргентина во најдолгата блокада во човечката историја“ и дека земјата била предмет на политичко влијание од одредени држави. „Аргентинците нема да дозволат меѓународна организација да интервенира во нашиот суверенитет, а уште помалку во нашето здравство“, рече Адорни.
Тој додаде дека Аргентина не добива средства од СЗО за управување со здравството и дека одлуката за повлекување нема да значи кратења. „Ова нема да влијае на квалитетот на здравствените услуги“, нагласи тој.
„Напротив, оваа одлука ѝ овозможува на земјата поголема флексибилност во спроведувањето на политиките прилагодени на контекстот и интересите што ги бара Аргентина, како и поголема достапност на ресурси“, продолжи Адорни. „Таа го зајакнува нашиот пат како земја со здравствен суверенитет“.
Како што пренесува Буенос Аирес Хералд, Аргентина покрај повлекувањето од СЗО „размислува да го напушти и Парискиот договор“ за климатските промени, додаде Адорни.
На 22 јануари, американскиот претседател Доналд Трамп објави дека земјата ќе се повлече од Светската здравствена организација, додавајќи дека глобалната здравствена агенција лошо се справила со пандемијата ковид-19 и други меѓународни здравствени кризи. Трамп потоа рече дека СЗО не успеала да биде независна од „несоодветно политичко влијание од земјите-членки“ и бара „неправедно тешки плаќања“ од САД кои се непропорционални со износите обезбедени од други, поголеми земји, како што е Кина.
„СЗО крадеше од нас, сите тие крадат од Соединетите држави. Тоа нема да се повтори“, рече Трамп при потпишувањето на извршната наредба за повлекување, веднаш по неговата инаугурација за втор мандат.
Овој потег значи дека САД ќе ја напуштат здравствената агенција на Обединетите нации за 12 месеци и ќе ги прекинат сите финансиски придонеси за нејзината работа. Соединетите Американски Држави се убедливо најголемиот финансиски поддржувач на СЗО, со околу 18 отсто од вкупното финансирање. Последниот двегодишен буџет на СЗО, за 2024-2025 година, изнесуваше 6,8 милијарди долари.
