Упатствата им дозволуваат на училиштата различни начини да ја спроведат забраната, вклучувајќи опции кои се движат од учениците да ги остават мобилните телефони дома, да ги чуваат во шкафчиња или да ги остават исклучени.
Според податоците на Офком, 97% од 12-годишниците имаат паметен телефон. Паметните телефони го одвлекуваат вниманието на учениците, а поради нивната распространетост, децата кои ги немаат можат да бидат подложени на потсмев, што врши притисок врз родителите, пишува Гардијан.
Гилијан Киган, министер за образование, рече: „Училиштата се места каде што децата учат, а мобилните телефони само им го одвлекуваат вниманието. На наставниците им даваме алатка за подобрување на однесувањето на учениците, што ќе ја олесни наставата“.
Во упатствата за наставниците беше објаснето дека правилата за мобилни телефони треба јасно да им бидат претставени на учениците, како и причините поради кои се воведуваат. Се додава и дека учениците не треба да ги гледаат наставниците со мобилни телефони, освен ако не им се потребни за работа.
Џеф Бартон, генерален секретар на Здружението на раководители на училишта и факултетите, рече дека времето што некои деца го поминуваат на мобилни телефони е загрижувачко, но дека овие упатства сè уште се „непостоечко решение за непостоечки проблем“. Тој додаде дека поголем проблем е што децата поминуваат толку многу време на мобилни телефони надвор од училиште. Повеќето училишта секако дозволуваа користење на мобилните телефони само за време на одмор или за време на одредени активности.
Вик Годард, директор на две училишта во Есекс, рече дека во едно од училиштата целосно ги забраниле мобилните телефони и дека тоа предизвикало позитивна реакција кај родителите и учениците. „Мислевме дека ќе имаме многу проблеми со родителите, но немавме. Учениците исто така почувствуваа олеснување. Овие упатства дефинитивно ќе им помогнат на училиштата. Инаку сè на што би се пожалиле родителите претставува проблем, така што ова ни дава сигурност“.
