Тие втор ден од 7 до 10 часот мирно ја блокираат и работата на Општина Чашка. Воедно поради блокада на патиштата веќе трет ден во училиштето во Чашка не доаѓаат со комбиња ни децата од албанската паралелка во прво одделение и останатите ученици од албанска националност од погорните одделенија, кои се од селата во Општина Чашка, а кои и досега само седеа во училниците но немаа настава, информира за МИА Цвета Пешовска од Советот на родители.
Таа најави дека со мирна блокада ќе продолжат в понеделник со блокирање на други важни институции за работа на Општината. Децата од македонска националност од училиштето во Чашка не посетуваат настава со започнување на протестите од 22 ноември лани, а не продолжија ниту во второто полугодие.
Пешовска нагласува дека не се против децата од албанска националност да учат во училиштето, но тоа да биде во заедничките паралелки со нивните деца на македонски наставен јазик, како што беше досега.
Тие предлагаат посебна паралелка за албански јазик за првачињата да се воведе во друго подрачно училиште во селата во Општина Чашка каде жителите се со албанска националност, но не и во Чашка каде нема ниту еден регистриран жител од албанска националност.
Инаку, таа информира дека протестот бил најавен во СВР Велес и дека трет ден полицијата го обезбедува без никакви инциденти.
Министерот за образование и наука Јетон Шаќири на нивните барања пред еден месец им одговори дека во училиштето се исполнети сите услови за формирање на паралелка на албански наставен јазик и најави дека ќе се заложи за смена на статутот на училиштето во Чашка, а кое е на настава на македонски јазик.
