На самиот почеток на средбата пред медиумите се обратија генералниот секретар на Северноатлантската алијанса, Јенс Столтенберг, како и украинскиот претседател Володимир Зеленски.
„Системите за противвоздушна одбрана се од најголема важност за одбрана на градовите, економиите и критичната инфраструктура. Кога економијата функционира, тогаш работите во Украина можат да функционираат. Тоа ќе им помогне на Украинците да работат, да тргуваат и да функционираат како нормална држава и ќе им помогне самостојно да се финансираат и да произведуваат муниција за војна“, рече Столтенберг.
Тој додаде дека рускиот претседател Владимир Путин ја користи „зимата како оружје“ напаѓајќи го енергетскиот систем.
„Мораме да го спречиме тоа. Со зајакнување на системите за противвоздушна одбрана ќе направиме значајна разлика“, уверен е генералниот секретар на НАТО.
Тој истакна дека храброста на украинскиот народ продолжува да ги импресионира и инспирира сите во НАТО.
„Вашата борба е наша борба, вашата безбедност е наша безбедност и вашите вредности се наши вредности. НАТО ќе стои на страната на Украина сѐ додека е потребно“, рече Столтенберг.
Украинскиот претседател истакна дека најголемиот предизвик е како да се преживее претстојната зима, за која на Киев му е потребна поддршка и зошто денеска е во Брисел.
„Ќе разговараме за тоа како да ги истераме Русите од нашата земја“, истакна Зеленски.
Тој истакна дека сака да разговара и за употребата на „замрзнатите“ руски пари за потребите за обнова на Украина по војната.
Столтенберг истакна дека на дневен ред, освен Украина, ќе бидат и палестинскиот напад врз Израел, операциите на НАТО во Ирак, како и на Косово и Метохија, како и зајакнување на одбраната на западната воена алијанса.
„Ќе разговараме и за инцидентите во Балтичкото Море, за штетата предизвикана на критичната подводна инфраструктура. Сега најважно е да се утврди што се случило. Ако утврдиме дека се работи за намерен напад на критична инфраструктура на НАТО, тоа би било сериозно, но би наишло на решителен и единствен одговор во НАТО“, вели Столтенберг.
На дводневниот самит ќе учествуваат министри за одбрана од 30 земји, како и министер од Шведска, чија земја сака да стане членка на НАТО.
