Во експлозиите во понеделникот на Кримскиот мост или Керчкиот мост загинаа двајца цивили и е онеспособен дел од патниот мост, кој неодамна се врати во целосна функција откако беше тешко оштетен во сличен напад во октомври. Украина го поздрави нападот од понеделникот, но властите директно не ја презедоа одговорноста. Москва ја обвини Украина.
Крим беше анектиран од Русија во 2014 година и Киев го сака назад додека се бори против руската 17 месечна инвазија.
Патниот и железнички мост изграден од Русија и отворен за сообраќај во 2018 година „не е само логистички пат“, рече Зеленски, обраќајќи се на безбедносна конференција во Аспен, САД, преку видео врска.
„Тоа е рута што се користи за хранење на војната со муниција и тоа се прави секојдневно. И го милитаризира Кримскиот полуостров“, рече Зеленски.
„За нас тоа е разбирливо непријателски објект изграден надвор од меѓународните закони и сите важечки норми. Значи, разбирливо, тоа е цел за нас. И целта што носи војна, а не мир, мора да биде неутрализирана“.
Зеленски, одговарајќи на прашањата на модераторот, негираше каква било поврзаност меѓу нападот и повлекувањето на Русија оваа недела од договорот за извоз на жито од украинските пристаништа. Русија, рече тој, од самиот почеток го блокира коридорот за жито.
„Тие подоцна се осврнаа на оваа ситуација околу Кримскиот мост“, рече тој. „Да не беше Кримскиот мост, ќе најдеа друг пример, друга причина“.
На долгоочекуваната контраофанзива на украинската војска, започната минатиот месец, ѝ требаше време да се подготви бидејќи руските окупациски сили поставија неколку одбранбени линии и интензивно ја минираа украинската територија, рече Зеленски.
Претседателот ја повтори својата претходна оценка дека контраофанзивата се одвива побавно отколку што би сакал.
Досегашната кампања беше фокусирана на заземање села на југ и враќање на областите што Русија ги зазеде во последните месеци на исток.
„Украина не отстапува. Постепено ги ослободува своите територии, што е многу важно“, рече Зеленски.
„Сепак, верувам дека се приближуваме до моментот кога операциите можат да добијат замав. Разбирам дека е подобро победата да дојде побрзо. Тоа е она што го сакаме и ние“.
