Од Владата велат дека поканите за сите делегации ги праќа организаторот, и во тој контекст до Македонија биле испратени повеќе покани. Претставниците на државните институции, велат од Владата, ги прифатија поканите од организаторот и позитивно одговорија во соодветен временски рок.
„По прифаќањето и дефинирањето на делегациите, истите беа во постојана комуникација и координација, за сите сегменти, вклучително и најважниот сегмент, а тоа се државните позиции и државниот интерес. Напоменуваме дека ова не е прво учество на земјата на Минхенската безбедносна конференција, ниту прв пат делегацијата да е составена од повеќе членови. Дополнително, Северна Македонија не е единствена држава претставена од делегации од повеќе институции, напротив – повеќето делегации се со повеќе членови, што лесно се проверува преку официјалните канали на организацијата“, се додава во реакцијата на Владата.
Пратеникот Антонио Милошоски вчера објави дека според дипломатските правила, една држава на меѓународна конференција не може истовремено да ја претставуваат претседателот на државата и премиерот, бидејќи и двајцата го имаат највисокиот ранг – шеф на држава и шеф на влада. Како шеф на делегацијата, вели Милошоски, оди или претседателот, или премиерот, но никако двајцата заедно.
