Ретката проповед на Хамнеи, негова прва по речиси пет години, доаѓа три дена пред годишнината од војната на Израел со Хамас во Газа, предизвикана од нападот на 7 октомври од страна на исламистичката група поддржана од Иран.
Врховниот лидер, кој ја има највисоката моќ во Иран, ќе ги предводи муслиманите во молитва во Големата џамија Мосала во центарот на Техеран, објавено е на неговата официјална веб-страница.
Молитвата ќе следи по комеморацијата во 9 часот по средноевропско време за Хасан Насрала, убиениот водач на либанската милитантна група Хезболах, поддржана од Техеран.
Иранската револуционерна гарда, која му одговара на Хамнеи, рече дека лансирањето на 200 проектили во вторникот било одмазда за убиството на Насрала од страна на Израел заедно со командантот на гардата Абас Нилфорушан во нападот врз Бејрут кон крајот на септември и лидерот на Хамас Исмаил Ханије во Техеран во јули.
Хамнеи последен пат водеше петочна молитва во јануари 2020 година, откако Иран истрела проектили врз американската воена база во Ирак како одговор на нападот во кој беше убиен моќниот командант на Револуционерната гарда Касем Сулејмани.
Во Техеран синоќа толпи веејќи знамиња на Хезболах и Иран се собраа пред зградата на поранешната американска амбасада во Техеран за да ги осудат „злосторствата“ на Израел во Појасот Газа и Либан, објавија иранските медиуми. Хамнеи прогласи јавна жалост за Насрала во Иран, а завчера изјави дека смртта на шефот на Хезболах „не е мала работа“.
