Меџити вели дека до нив досега не стигнало барање од ВМРО-ДПМНЕ за поддршка на нивниот кандидат, Гордана Силјановска-Давкова.
„Сега за сега немаат побарано таква поддршка, Но за волја на вистината, голема е разликата во гласовите. Повеќе е формален вториот круг. Деновиве ние, лидерите на Вреди, ќе седнеме и ќе донесеме одлука“, изјави Меџити.
Во вториот круг од претседателските избори, кои ќе се одржат заедно со парламентарните на 8 мај, влегоа Гордана Сиљановска-Давкова, поддржана од ВМРО-ДПМНЕ, и актуелниот шеф на државата и кандидат за втор мандат на функцијата Стево Пендаровски, кој ја има поддршката на СДСМ.
По првиот круг од претседателските избори веќе е најавена можната соработка на ВМРО-ДПМНЕ и коалицијата Вреди во формирањето на нова владина коалиција по завршување на парламентарните избори.
За избор на претседател во вториот круг потребен е цензус, што значи дека треба да излезат и да гласаат најмалку 40 отсто од граѓаните запишани во единствениот избирачки список.
