Компанијата организираше туристичко патување до остатоците од Титаник стари 111 години по цена од 250.000 долари. Лохриџ работел како независен изведувач за Оушнгејт во 2015 година, а потоа и како вработен помеѓу 2016 и 2018 година, објави Си-ен-ен. Наскоро тој влегол во судски спор со Оушнгејт тврдејќи дека бил неправедно отпуштен затоа што изразил загриженост за безбедноста и тестирањето на Титан.
„Би се сметал себеси за прилично храбар кога станува збор за правење опасни работи, но таа подморница е несреќа што чека да се случи. Не можат ниту да ми платат да нурнам со таа подморница“, напиша Лохриџ во е-пошта до Роб Мекалум, соработник на проектот.
Мекалум, кој водел експедиции на Титаник, го предупредил Раш во 2018 година за безбедноста на подморницата Титан, велејќи му на извршниот директор дека се доведува себеси и своите клиенти во опасност. Бродот на Оушнгејт бил околу 1 час и 45 минути во планираното нуркање за да дојде до остатоците од Титаник кога изгубил контакт со својот матичен брод на 18 јуни.
Неколку дена подоцна, официјални лица потврдија дека Титан претрпел „катастрофална имплозија“. Загинаа сите пет членови на екипажот: Раш, британскиот бизнисмен Хамиш Хардинг, францускиот нуркач Пол-Анри Наргеолет, пакистанскиот милијардер Шахзада Давуд и неговиот 19-годишен син Сулеман Давуд.
