четврток, 20 јуни 2024

Водата во Куманово и натаму мора да се користи како техничка

Поради заматеност на водата во градскиот водовод како последица од невремето и натаму во Куманово водата треба да се користи како техничка. Околу 20 проценти од домаќинствата во градот и наматаму немаат вода, но се очекува во наредните часови целиот град да има вода.

Објавено на

часот

Сподели

Во моментов без вода се повисоките делови од градот, граѓаните од адресите на улиците Народна револуција, од Франц Розман“, Бајрам Шабани, граѓаните од делот во близина на градските гробишта. Кај граѓаните од централното градско подрачје, според информациите, целосно е стабилизирано водоснабдувањето.

„Над 80 отсто од граѓаните непречено добиваат вода од водоснабдителниот систем. Во текот на наредните неколку часа се очекува целосно стабилизирање во сите делови од градот. Напомнуваме водата да се користи како техничка, се до конечна потврда од Центарот за јавно здравје кои треба да направат три последователни анализи кои ќе ја потврдат исправноста на водата на пиење“, изјави директорот на ЈП „Водовод“, Оливер Стојамновски.

По првата анализа резултатите се очекуваат во рок од 48 часа, а потребни се три последователни анализи.

 

И кумановскиот градоначалник Максим Димитриевски информираше дека водоснабдувањето полека се стабилизира и ќе се надмине проблемот во текот на наредните часа.

„Извинување во мое име и благодарност до сите граѓани за разбирањето за настанатата хаварија и нарушениот процес на водоснабдување на градот поради лошите временски услови. Благодарност до екипите на ЈП Водовод кои многу посветено и професионално го санираа овој проблем со водоснабдување на градот“, вели Димитриевски.

Во текот на денот ќе се одржи уште еден состанок на општински штаб за заштита и спасување.

Вчера утрото надлежните информираа дека водата е заматена поради обилните дождови во Липковско. Во текот на вчерашниот ден кумановци немаа вода, освен неколку населби кои се снабдуваат со вода од Митев Мост и Бедиње.

ТОП ВЕСТИ

ПОСЛЕДНИ ВЕСТИ