„Во овој избор насловен ’10 во 12′ ќе видиме 12 дела изработени во мал формат изминативе 10 години. Тие претставуваат своевиден пресек на една декада творење на Костадин Батев и претставуваат целина од неколку засебни минијатури, графики и акварели кои коегзистираат и како засебни единки и како целина. Батев е познат на струмичката публика, неговото творештво е веќе дел од колективната меморија на струмичките колекционери и љубители на уметноста. Тој како учесник на Меѓународната ликовната колонија и со своја самостојна изложба веќе ги има претставувано своите сликарските светогледи пред своите сограѓани“, пишува во информацијата од организаторите.
Костадин Батев е роден 1979 година во Струмица. Средно уметничко училиште завршил во Скопје во 1997 година, а во 2004-та година дипломира на Факултетот за ликовни уметности, отсек сликарство со графички дизајн во класата на професор Вело Ташовски. Член на Друштвото на ликовни уметници е од 2000 година, а зад себе има шест самостојни изложби и голем број групни изложби и учества на ликовни колонии.
