Политичкиот раководител на Социјалистичката партија за округот Корча и пратеник од оваа изборна единица, Нико Пелеши, пред присутните ги претстави кандидатите за пратеници и рече дека „ова е победничкиот тим кој ќе биде гласот на секој граѓанин во албанското Собрание”.
„Со посветен тим подготвен да ги унапреди проектите и реформите кои ја направија Корча успешна приказна, ние одлучно продолжуваме по патот кон четвртиот мандат за европска Албанија“, изјави Пелеши.
Исто така, Пелеши го претстави и Стерјовски, нарекувајќи го „значаен глас за македонската заедница во Албанија и посветена фигура во политичката и академската јавност”.
„На овие избори Општина Пустец населена со македонско население ќе ја претставува најдобриот син на Преспа, Васил Стерјовски, кој е претседател на партијата Македонска алијанса за европска интеграција. Ова е единствената партија со која коалицираме на овие избори бидејќи за нас македонската заедница е важна. Оваа соработка е доказ за меѓусебно ценење и почитување, како и важен чекор кон зајакнување на политичката застапеност на македонската заедница и на сите граѓани од овој регион“, истакна Пелеши.
Додаде дека Стерјовски е „образован и вреден млад човек, поранешен пратеник, докажан како политичар и педагог”.
„Заедно ќе работиме за доброто на Македонците во Преспа, Голо Брдо и Гора и за целата прекрасна македонска заедница во Албанија“, посочи Пелеши.
Стерјовски е роден на 17 мај 1982 година во Корча. Работи како професор на Универзитетот Фан Ноли во Корча, докторанд е на Универзитетот Свети Кирил и Методиј во Скопје. Оженет е и е татко на две деца.
Лидер на МАЕИ е од 2019 година, пратеник беше во претходниот парламентарен состав и е прв пратеник Македонец, кој јавно се декларираше како Македонец. На една од пленарните седници тој до пратениците се обрати на македонски јазик, што беше историско достигнување на Македонците во Албанија.
