Земјите-членки на Европската унија (ЕУ) и Европската економска област (ЕЕА) пријавија „зголемен број на изолати на ешерихија коли кои го носат генот блаНДМ-5, што ги прави отпорни на карбапенеми“, објави ЕЦДЦ во средината на мај. Карбапенемите се антибиотици со широк спектар „кои се користат како последно средство за лекување на потешки инфекции со ешерихија коли“, велат од ЕЦДЦ.
Се предупредува дека видовите на бактерии кои носат блаНДМ-5 се „веќе воспоставени“ и „претставуваат нова закана“ со оглед на тоа што тие би можеле да бидат отпорни и на други антибиотици, вклучувајќи аминогликозиди, флуорокинолони и триметоприм-сулфаметоксазол.
Ешерихија коли е најчеста причина за инфекции на крвотокот и уринарниот тракт (ИУТ) во Европа, објави ЕЦДЦ. Истражување од март на научници од Соединетите Држави укажа на зоонотска ешерихија коли која се пренесува преку храната предизвикува половина милион инфекции на уринарниот тракт годишно.
ЕЦДЦ, агенцијата на ЕУ чија цел е да ја зајакне одбраната на населението во Европа од заразни болести, тврди дека видот отпорен на антимикробни лекови веројатно е поврзан со земјите во Африка и Азија. Своето тврдење го заснова на информации за патувања и хоспитализација на поединци, кои укажуваат дека повеќе од 80 проценти од случаите на инфекција би можеле да потекнуваат од области надвор од Европа.
Агенцијата препорачува дополнително зајакнување на мерките за рано откривање на инфекцијата и нејзина контрола и посочува дека ширењето на резистентни соеви во и меѓу здравствените институции може да го зголеми товарот што го чувствуваат здравствените системи низ Европа. Имено, во европските земји годишно умираат повеќе од 35.000 луѓе како последица на инфекции отпорни на антибиотици.
„Сојот на ешерихија коли кој го носи генот блаНДМ-5 се шири брзо и на поголеми географски размери. Затоа постои ризик дека бројот на случаи на инфекција со ешерихија коли отпорни на карбапенем ќе се зголеми во ЕУ/ЕЕА веќе во рок од неколку години“, предупредија од ЕЦДЦ.
